२८ माघ, काठमाडौँ । आदिवासी जनजाति उत्थान राष्ट्रिय प्रतिष्ठानको रजत जयन्तीको अवसरमा आयोजित तीन दिवसीय ‘नेपाल आदिवासी ज्ञान सम्मेलन–२०८२’ मंगलबार भव्यताका साथ सम्पन्न भएको छ।

“ज्ञान बाँडफाँड, सम्पदा संरक्षण र भविष्य निर्माण” भन्ने मूल नाराका साथ राष्ट्रिय सभा गृहमा आयोजित यस सम्मेलनको उद्घाटन राष्ट्रपति रामचन्द्र पौडेलले र समापन अर्थमन्त्री रामेश्वरप्रसाद खनालले गरेका थिए ।

सम्मेलनमा जलवायु परिवर्तन, आदिवासी सिनेमा, सौन्दर्यशास्त्र, महिलाको अवस्था, प्रथाजन्य कानुन र खाद्य प्रणाली जस्ता १५ वटा विभिन्न विषयगत शिर्षकहरुमा ८१ ओटा अनुसन्धानात्मक कार्यपत्र प्रस्तुत गरिएको थियो ।

समापनका क्रममा प्रतिष्ठानका उपाध्यक्ष रेशम गुरुङले सम्मेलन उपलब्धिमूलक रहेको बताउँदै प्रस्तुत कार्यपत्रहरूलाई समेटेर सरकारसमक्ष प्रतिवेदन बुझाइने र आदिवासी ज्ञानलाई नीति निर्माणमा जोड्न पहल गर्ने प्रतिबद्धता व्यक्त गरेका थिए ।

उनले भने,‘भावी पुस्ताका लागि प्रस्तुत कार्यपत्र प्रकाशन सरकारसमक्ष प्रतिवेदन बनाएर पेश गरिनेछ । सहभागीहरु उल्लेख्य उपस्थिति ऐतिहासिक भएको छ ।  विभिन्न स्वदेश र विदेशबाट जम्मा भएका सम्पूर्णलाई धन्यवाद ।’

मूलुकलाई परिवर्तन गर्न आफैबाट सुरु गर्नुपर्ने उनले बताए  । उनले भने, ‘सरकारको नजिक रहेर काम गरेको यो प्रतिष्ठानमा ११ करोडको बजेटमा छौँ । समावेशी भवन निमार्ण भएको छ । ’ उनले प्रस्तुत कार्यपत्र सरकारसमक्ष पेश गरी आदिवासीको उत्थान गर्न पहल गर्ने प्रतिबद्धता जनाए । 

सांस्कृतिक प्रदर्शनमा सुनुवारको श्याँदर सिल–नृत्य, भोटे समुदायको स्याप्रो नृत्य, गुरुङको सोरठ्ठी, तामाङको डम्फु सेलो, राजवंशीको मौलिक नृत्य, मगरको कौराह नाच प्रदर्शन गरिएको थियो । महोत्सवमा थकाली, राई, नेवारी, शेर्पा, थारु आदिवासीको मौलिक परिकारमा पस्किएको थियो ।