१३ मङ्सिर, नुवाकोट । नेपालको डिजिटल जगतलाई जोड्ने र वर्डप्रेस प्रविधिको ज्ञान आदानप्रदान गर्ने बृहत् कार्यक्रम ‘वर्डक्याम्प नेपाल २०२६’ यस वर्ष लुम्बिनी प्रदेशको बुटवलमा आयोजना हुने भएको छ।

सम्मेलन आगामी माघ ९ र १० गते (तदनुसार जनवरी २३ र २४, २०२६) मा बुटवलको रमणीय स्थल मणिग्राम विश्राम बाटिकामा आयोजना हुँदैछ।

प्रविधि र व्यापारको केन्द्रका रूपमा उदाउँदै गरेको लुम्बिनी प्रदेशको लागि यो सम्मेलन एक महत्वपूर्ण अवसर हो। आयोजकहरूका अनुसार, काठमाडौँ बाहिर कार्यक्रम आयोजना गर्नुको मुख्य उद्देश्य देशव्यापी रूपमा वर्डप्रेस सम्बन्धी ज्ञान, सीप र व्यावसायिक अवसरहरू पुर्याउनु हो।

यो कदमले नेपालको बढ्दो डिजिटल अर्थतन्त्रलाई थप सशक्त बनाउने अपेक्षा गरिएको छ, किनकि वर्डप्रेसले वेबसाइट निर्माण, सामग्री व्यवस्थापन र ई-वाणिज्य समाधानमा महत्वपूर्ण भूमिका खेल्दै आएको छ। भैरहवा र लुम्बिनी जस्ता महत्वपूर्ण स्थानको नजिकै रहेको बुटवलको छनोटले तराई क्षेत्रका साथै देशभरका सहभागीहरूलाई आकर्षण गर्ने विश्वास गरिएको छ।

दुई दिनसम्म चल्ने सम्मेलनले सिक्ने, नेटवर्क बनाउने र वर्डप्रेस समुदाय निर्माण गर्ने अवसर प्रदान गर्ने जनाएको छ ।

कार्यक्रमको पहिलो दिन वर्डप्रेस परियोजनामा प्रत्यक्ष योगदान गर्ने दिन हुनेछ। सहभागीहरूले विभिन्न टिम र समूहमा संलग्न भई सहयोग, सिकाइ र वर्डप्रेसको भविष्य निर्माणमा आफ्नो भूमिका निर्वाह गर्न सक्नेछन्।

दोस्रो दिन प्रविधि क्षेत्रका विशेषज्ञ वक्ता, प्यानल छलफल र व्यवहारिक कार्यशालाहरू रहनेछन्। यस दिन वर्डप्रेससँग सम्बन्धित नयाँ प्रवृत्ति, उत्तम अभ्यास र नवीनतम जानकारीहरू सिक्ने विशेष अवसर जुट्नेछ।

यो सम्मेलन वर्डप्रेसमा रुचि राख्ने सबैका लागि उपयोगी छ। यसमा वेब विकासकर्ता, प्लगइन र थिम निर्माता, डिजाइनर, खोज इन्जिन विशेषज्ञ, व्यवसाय सञ्चालक, सामग्री निर्माता, विद्यार्थी लगायत सम्पूर्ण वर्डप्रेसप्रेमीहरूले भाग लिन सक्नेछन्।

उक्त सम्मेलनमा सहभागिताका लागि अनलाइन दर्ता खुला भइसकेको छ। इच्छुक सहभागीहरूले टिकटका लागि आधिकारिक वेबसाइटमा जान सक्नेछन्।