२३ चैत, नुवाकोट । गृह मन्त्रालयले सार्वजनिक गरेको आर्थिक वर्ष २०८२/८३ को दोस्रो त्रैमासिक जिल्ला श्रेणी तालिका अनुसार कार्यसम्पादन मूल्यांकनमा नुवाकोट जिल्ला देशभरमै दोस्रो स्थान हासिल गर्न सफल भएको छ ।

मन्त्रालयले विभिन्न सूचकका आधारमा गरेको मूल्यांकनमा कुल २०.२५ पूर्णाङ्कमा नुवाकोटले १९.३७५ अंक प्राप्त गर्दै उत्कृष्ट नतिजा निकालेको हो । ७७ जिल्ला सहभागी यस प्रतिस्पर्धामा नुवाकोटको यो उपलब्धिलाई स्थानीय प्रशासनको सक्रियता र कार्यकुशलताको रूपमा हेरिएको छ।

मन्त्रालयद्वारा सार्वजनिक गरिएको तथ्याङ्कअनुसार नुवाकोटले मूल्यांकनका लागि तोकिएका ५४ वटा मापदण्डमध्ये ५५ वटा फाइलहरू अपलोड गरेको थियो । तीमध्ये ५४ वटा फाइलहरू स्वीकृत भएका छन् भने मात्र एउटा फाइल अस्वीकृत भएको देखिन्छ ।

नुवाकोटभन्दा अगाडि हिमाली जिल्ला मनाङ १९.५ अंकका साथ पहिलो स्थानमा रहेको छ भने डोटी, पर्वत, रूपन्देही र स्याङ्जा समान १९.२५ अंक प्राप्त गरी तेस्रो स्थानमा रहेका छन् ।

यस मूल्यांकन प्रक्रियामा जिल्ला प्रशासन कार्यालयहरूले सम्पादन गरेका कार्यहरूको विवरण अनलाइन प्रणालीमार्फत अपलोड गर्नुपर्ने व्यवस्था छ । मन्त्रालयका अनुसार यो मूल्यांकनले जिल्लाहरू बीच विकास, सुशासन र सेवा प्रवाहमा स्वस्थ प्रतिस्पर्धाको वातावरण सिर्जना गरेको छ।

तालिकाअनुसार देशको संघीय राजधानी समेत रहेको काठमाडौँ जिल्ला ७७ औँ स्थानमा सीमित भएको छ । त्यस्तै, धनुषा र पर्सा क्रमशः ७६ औँ र ७५ औँ स्थानमा रहेका छन् ।