विदुरमा एचपिभी खोप ९९.९ प्रतिशत लक्ष्य हासिल

२९ माघ, नुवाकोट । ह्युमन प्यापिलोमा भाइरस (एचपिभी) खोपको राष्ट्रिय अभियान अन्तर्गत विदुर नगरपालिकाले ९९.९ प्रतिशत लक्ष्य हासिल गरेको छ ।

तथ्यांकअनुसार खोप अभियानमा नगरपालिकाका दुई हजार ७४७ जना किशोरीहरुले खोप लगाएको विदुर नगरपालिकाको स्वास्थ्य शाखाका प्रमुख रामराजा भण्डारीले जानकारी दिए । लक्ष्यभन्दा तीन जना किशोरीले खोप नलगाएको देखिएको छ । नगरका दुई हजार ७५० जना किशोरीहरुलाई खोप लगाउने लक्ष्य राखिएको थियो ।

सबैभन्दा बढी ९ नम्बर वडाका शहरी स्वास्थ्य केन्द्रमा १०७.१ प्रतिशतले खोप लगाएका छन् भने सबैभन्दा कम २ नम्बर वडाको नुवाकोट स्वास्थ्य चौकीमा ८८.६ प्रतिशत छ ।

नगरपालिकाका ४४ वटा विद्यालय र १९ वटा स्वास्थ्य संस्थामा खोप केन्द्र बनाई पाठेघरको मुखको क्यान्सरविरुद्धको एचपिभी खोप अभियान सञ्चालन गरिएको थियो ।

बालविवाह गरी अन्यत्र गएका, आफ्नै स्रोतमा लगाएको, बिरामी भएको लगायतका कारणले केही किशोरीहरुले खोप नलगाएको उनले जानकारी दिए । किशोरीलाई पाठेघरको मुखको क्यान्सरविरुद्धको एचपिभी खोप अभियानमा दिइने खोप सुरक्षित रहेतापनि केहिले अझै पनि पारिवारिक कारण र खोपबारे भ्रमले पनि खोप लगाउन नपाएको उनले बताए ।

‘अहिले नगरपालिकासँग तीन डोज बाँकी छ’, उनले भने ‘खोप लगाउन छुटेका केन्द्र वा स्थानमा भोलिदेखि हामी र सम्बन्धित महिला स्वास्थ्य स्वयंसेविकासहितको टोली घरदैलो गरेर तथ्यांक निकाल्छौँ । खोपको भ्रम र यथार्थबारे अभिभावकसँग भेट गरी खोप लगाउन पहल गर्ने छौं ।’

घरदैलोबाट छुटेको तथ्यांकअनुसार खोप माग गरी राष्ट्रिय अभियानको समयसिमाभित्र खोप लगाउने उनले बताए ।

लक्ष्यभन्दा बढी ६ खोप केन्द्रबाट बढी २१ जना किशोरीहरुलाई खोप लगाईएको उनले जानकारी दिए । जिल्लाबाहिरका रहेका किशोरीहरु घर आउँदा खोप लगाएको हो ।

नेपाल सरकारले राष्ट्रिय खोप कार्यक्रममार्फत निःशुल्क प्रदान गरिएको सबै खोप विश्व स्वास्थ्य सङ्गठनबाट मान्यता प्राप्त हुने हुदाँ नेपालको औषधी व्यवस्था विभागले स्वीकृत गरेको हुनाले यो खोप पनि अत्यन्तै सुरक्षित र प्रभावकारी रहेको परिवार कल्याण महाशाखाअन्तर्गत खोप शाखाले जनाएको छ ।

एचपिभी भनेको के हो ?

यो एक प्रकारको भाइरस हो । पाठेघरको मुखको क्यान्सरको प्रमुख कारक एचपिभी भाइरस हो । एचपिभी भाइरस दुई सयभन्दा बढी किसिमका प्रजातिहरू हुन्छन् । तीमध्ये कम्तीमा १२ वटा प्रजाति पाठेघरको मुखको क्यान्सर गराउने प्रमुख कारक मानिन्छ भने यसमध्ये पनि १६ र १८ प्रजाति प्रमुख कारक हुन् । नेपालमा ८० प्रतिशत पाठेघरको मुखको क्यान्सर १६ र १८ प्रजातिबाट भएको देखिन्छ ।

नेपालमा महिलाहरुमा हुने विभिन्न क्यान्सरमध्ये पाठेघरको मुखको क्यान्सर महिलाहरूको मृत्युको प्रमुख कारण हो । यो रोगबाट नेपालमा प्रत्येक दिन चार जनाको मृत्यु हुन्छ ।