नुवाकोट – खानीगाउँमा मगर समुदायको लोपोन्मुख परम्परागत साँस्कृतिक घाँटु नाचका साथै बृहत सांस्कृतिक कार्यक्रम भएको छ ।

चण्डेश्वरी संरक्षण समिति मगर समाज उपभोक्ता समितिको आयोजनामा भएको कार्यक्रममा लिखु गाउँपालिकाको अध्यक्ष ध्रुव श्रेष्ठको प्रमुख आतिथ्यता रहेको थियो ।

अध्यक्ष श्रेष्ठले धर्म, संस्कृति जगेर्ना गर्न स्थानीय तहको कर्तव्य रहेको बताउँदै पालिकाले आगामी बजेटमा लोपोन्मुख घाटु नाचको संरक्षण सम्बर्द्धन तथा भौतिक पूर्वधार निर्माणका निम्ति बजेट विनियोजन गर्ने प्रतिबद्धता व्यक्त गरे ।

लोपोन्मुख अवस्थामा पुगेको घाँटु नाच संरक्षणमा समाज जुटेकाे समाजका अध्यक्ष सुनिल थापामगरले बताए । घाँटु संरक्षण गर्न जनस्तरबाटै आर्थिक संकलन भएको भन्दै यो क्रम अझ बढेर जाने समेत उनले बताए । पुरानो सांस्कृतिक नाच भए पनि नयाँ पुस्ताको चासो नहुनु र पुरानो पुस्ताबाट हस्तान्तरणका लागि पहल नहुनुजस्ता कारणले लोपहुँदै गएको नाच संरक्षणका लागि आफूहरुका लागिपरेको अध्यक्षले थापाले बताए । 

कार्यक्रममा कलाकारहरू सुनिल थापामगर, शेरबहादुर गुरूङ, रोशन बालुवा, रमेश श्रेष्ठ, सीता घिमिरे, अनिसा गिरी, श्रीकृष्ण थापा, रूपक सिम्खडालगायतको बेजोड प्रस्तुति रहेको थियो ।

घाँटुमा नाच्नका लागि घाँटुकी कन्या कथाको विषयबस्तु अनुसार आवश्यक संख्यामा छानिन्छ । घाँटु नृत्यको गीतमा मानिसको जीवनशैली, जन्म, कर्म, शङ्गार, बिहेवारी, शिकार, माछा मार्ने, खेतीपाती तथा युद्धबारे व्याख्या तथा अभिनय गर्ने गरिन्छ ।