२४ मङ्सिर, नुवाकोट । त्रिशूली अस्पतालको तथ्यांकअनुसार चालुआर्थिक वर्ष २०८२/०८३ को साउन महिनादेखि कार्तिकसम्मका हिंसासम्बन्धी ३४ जना बिरामीले उपचार सेवा लिएका छन् ।

अस्पतालको एकद्वार संकट व्यवस्थापन केन्द्रको अभिलेखअनुसार चौमासिक अवधिमा कुल ३४ वटा हिंसाबाट प्रभावित व्यक्तिहरुले परामर्श तथा उपचार सेवाका लिएको अस्पतालका वरिष्ठ नर्सिङ्ग अधिकृत देवकी पुडासैनीले जानकारी दिईन् ।

तथ्यांकअनुसार अस्पतालमा बलात्कारका ६ ओटा, यौन दुर्व्यवहारका ४ ओटा, शारीरिक यातनाका १७ ओटा, स्रोत/साधनबाट वञ्चित गराउने प्रकारका ६ ओटा र मानसिक दुर्व्यवहारका १ ओटा घटनाका बिरामीहरुले उपचार तथा परामर्श सेवा लिएका छन्।

सबैभन्दा धेरै शारीरिक हिंसाबाट पिडित बिरामीहरुले उपचार तथा परामर्श सेवा लिएका छन् । यसैगरी मानसिक हिंसा र यौन दुर्व्यवहारबाट पिडित बिरामीले उपचार गर्न आएको जनाएको छ।

हिंसाबाट प्रभावित व्यक्तिहरूलाई स्वास्थ्य उपचारसँगै मनोसामाजिक परामर्श, आवश्यक परे कानुनी प्रक्रिया र संरक्षणका सेवासमेत अस्पतालमार्फत् उपलब्ध गराइँदै आईरहेको उनीले जानकारी दिईन् ।

अस्पतालले हिंसा पीडितलाई सुरक्षित वातावरणमा उपचार तथा सहजीकरण सेवा प्रदान गर्ने उद्देश्यले एकद्वार सङ्कट प्रणालीमार्फत घटना व्यवस्थापन गर्दै आईरहेको अस्पतालले जनाएको छ।