नुवाकोटको दुई जनामा कोरोना संक्रमणको पुष्टि

नुवाकोट – आज विदुर नगरपालिकाका दुई जना पुरुषमा कोरोना संक्रमण भएको पुष्टि भएको छ । यो सँगै जिल्लामा ५ जना संक्रमित भएका छन्।

राष्ट्रिय जनस्वास्थ्य प्रयाेशाला काठमाडौंमा गरिएकाे परिक्षणमा विदुर नगरपालिकाका १७ र २३ वर्षका पुरुष रहेका स्वास्थ्य तथा जनसंख्या मन्त्रालयका प्रवक्ता जागेश्वर गाैतमले जानकारी दिएका छन् । संक्रमितहरु विदुर नगरपालिका वडा नम्बर ३ र वडा नम्बर ४ को रहेको बताइएको छ ।

विदुर नगरपालिका वडा नम्बर १ त्रिशूलीमा रहेको शैक्षिक तालिम केन्द्र बनेको क्वारेन्टिनमा बस्दै आएका उनीहरुमा कोरोना संक्रमण भएको स्वास्थ्य कार्यालय नुवाकोटका सूचना अधिकारी उत्तम खनालले जानकारी दिए ।

उनीहरु भारतबाट आई यहि जेठ १० गतेदेखि क्वारेन्टिनमा बस्दै आइरहेका थिए । उनीहरुको आरडिटि पोजेटिभ देखिएपछि स्वाब संकलन गर्दा पिसिआर रिपोर्ट समेत पोजेटिभ देखिएको थियो ।

संक्रमित द्वयलाई जिल्ला अस्पतालमा रहेको आइसोलेशन वार्डमा राखिएको अस्पतालका मेडिकल सुपरिन्टेन्डेन्ट डा. रेमकुमार राईले जानकारी दिए ।

आज तारकेश्वर गाउँपालिकामा गरिएको आरडीटि परीक्षणमा ३ जनामा पोजेटिभ देखिएको छ।

तीन सय २३ जना नयाँ सङ्क्रमित थपिए

नेपालमा कोरोना सङ्क्रमितको सङ्ख्या चार हजार नाघेको छ । देशभरबाट मङ्गलबार तीन सय २३ जना नयाँ सङ्क्रमित थपिएसँगै सङ्क्रमितको सङ्ख्या चार हजार ८५ पुगेको हो ।

आज विभिन्न जिल्लाका गरी दुई सय ९२ जना पुरुष र ३१ जना महिलामा कोरोना सङ्क्रमण पुष्टि भएको हो । आज थपिएकासहित तीन हजार सात सय ९८ पुरुष र दुई सय ८७ महिला रहेकाे स्वास्थ्य तथा जनसङ्ख्या मन्त्रालयले जनाएको छ ।

त्यस्तै नेपालमा कोरोना सङ्क्रमणकाे कारण ज्यान गुमाउनेको सङ्ख्या १५ पुगेको छ । चितवनको भरतपुर अस्पतालमा भरतपुर ११ का पुरुषको ज्यान गएको मन्त्रालयले जनाएको छ ।