कोरियन इन्टरनेसनल को–अपरेसन एजेन्सी (कोइका) ले भूकम्पबाट क्षतिग्रस्त भएका नुवाकोटका १० स्वास्थ्यचौकीको पुनर्निर्माण सुरु भएको जनाएको छ ।

कोइकाले स्वास्थ्य मन्त्रालय र संयुक्त राष्ट्र संघीय विकास कार्यक्रम (यूएनडीपी) साझेदारीमा भूकम्पबाट क्षतिग्रस्त १० स्वास्थ्यचौकी र सामुदायिक जिल्ला अस्पताल पुनर्निर्माण सुरु गरेको हो । बेलकोट गाविसको वडा नं. ५ तिगाउँ पुगेर कोरियन राजदूत चोई योङ जीनले स्वास्थ्य चौकीहरूको पुनर्निर्माण सुरु भएको घोषणा गरेका हुन् । ‘भूकम्पबाट क्षति पुगेर उपचारमा समस्या भएका १० स्वास्थ्य चौकीको पुर्ननिर्माण गर्दैछौँ, उनले भने, ‘तीन महिनाभित्र पुर्ननिर्माणको काम सम्पन्न हुने छ ।’

बेलकोटसहित चारघरे, सूर्यमति, थप्प्रेक, पञ्चकन्या, रातमाटे, दुईपिपल, सिसडोल, घ्याङफेदी र लिखु गाविसमा स्वास्थ्यचौकी पुनर्निर्माण गर्ने लक्ष्य राखिएको छ । ‘१० वटामध्ये तीन वटा स्वास्थ्य चौकी अहिले पनि टेन्टमै सञ्चालन भइरहेको र बाँकी अस्थायी रूपमा दुःखसुख गरेर चलाइरहेको जिल्लाका स्वास्थ्य कार्यालयका प्रमुख विश्वराम श्रेष्ठले बताए ।

कोइकाले त्रिशूलीमा दुई वर्षभित्र जिल्ला अस्पतालको भवनसमेत निर्माण गर्नेछ । स्वास्थ्य चौकी पुनर्निर्माणका कारण १० गाविसका ५० हजार जनालाई प्रत्यक्ष स्वास्थ्य सेवा पुग्न सहयोग पुग्ने अपेक्षा गरिएको छ । अस्पतालसहित १० स्वास्थ्यचौकीका लागि कोरियाले ८४ करोड रुपैयाँ सहयोग गरेको जिल्ला स्वास्थ्य कार्यालय नुवाकोटले जनाएको छ ।

कोइकाले भूकम्पपछिको पुनर्निर्माणका लागि सरकारले दाता सम्मेलनमा १ अर्ब सहयोगको घोषणा गरेकोमा १६ करोड डोजरलगायत उपकरण किन्नमा सहयोग गरेको कोरियाले बाँकी सबै रकम नुवाकोटमा खर्च गर्न लागेको हो । बर्थिङ सेन्टरसहितको स्वास्थ्य चौकी निर्माणका लागि यूएनडीपीले २० नेपाली इन्जिनियरलाई तालिम दिनुका साथै निर्माणमा सहयोग गरेको छ । अत्याधुनिक तरिकाले निर्माण हुने भवनमा स्थानीय स्रोत साधन तथा जनशक्ति परिचालन गर्ने लक्ष्य राखिएको छ । ‘प्राविधिक रूपमा योग्य आधुनिक स्वास्थ्य भवन बनाउन लागेका छौं,’ यूएनडीपीकी उपकार्यकारी निर्देशक सोफीले भनिन्, ‘यसमा दक्ष जनशक्ति परिचालन गरिनेछ ।’ स्वास्थ्य चौकी समयमै बनाउन सरकारले पनि सहयोग गर्ने भएको छ । नुवाकोटका प्रमुख जिल्ला अधिकारी विष्णु पोखरेलले पुनर्निर्माणले स्वास्थ्य सेवा दिनमा ठूलो सहयोग हुने र यसका लागि सरकारले सहयोग गर्ने बताए । ‘समयमै स्वास्थ्य चौकी निर्माणका लागि सरकारले सहयोग गर्नेछ, यसबाट धेरै स्थानीयले फाइदा लिन सक्नेछन्,’ उनले भने ।

भूकम्पका कारण क्षति भएर आवश्यक सेवा पाउन नसकिरहेको बेला स्वास्थ्य चौकी निर्माणको सुरुवातले स्थानीय खुसी देखिएका छन् ।

बेल्कोट गाविसका पूर्वउपाध्यक्ष रामहरि पाण्डेले अमेरिकामा बसोबास गर्दै आएका तिगाउँका अच्यूत सिग्देल, विष्णु रानामगर, निरञ्जन पाण्डे र प्रदीपजंग पाण्डेको आर्थिक सहयोगमा सो स्वास्थ्यचौकी भवन बनाउन जग्गा खरिद गरिएको जानकारी दिए ।