१६ फागुन, विदुर । नुवाकोट क्षेत्र नं. २ का उम्मेदवार ज्ञानेन्द्र प्रकाश घलेले निर्वाचनमा हुने भ्रष्टाचारलाई निर्मूल पार्न व्यवहारमै पारदर्शिताको नमूना प्रस्तुत गरेका छन्।

“भ्रष्टाचार चुनावबाटै सुरु हुन्छ” भन्ने मान्यता राख्दै उज्योलो नेपाल पार्टीबाट उम्मेदवारी दिएका उनले आफ्नो चुनावी अभियानको क्रममै खर्च र आम्दानीको स्रोत सार्वजनिक गरेका हुन्। उनले सुशासनलाई केवल कागजमा सीमित नराखी व्यवहारमा उतार्न यो कदम चालिएको बताएका छन्।

घलेद्वारा सार्वजनिक गरिएको वित्तीय तथ्य अनुसार, हालसम्मको चुनावी अभियानमा कुल ७ लाख ९४ हजार ५६३ रुपैयाँ खर्च भएको छ। जसमध्ये आधिकारिक चुनावी कोषमा २ लाख ७५ हजार रुपैयाँ संकलन भएको छ भने बाँकी ५ लाख १९ हजार ५६३ रुपैयाँ उनले आफ्नै व्यक्तिगत खाता र नगदबाट व्यवस्थापन गरेका छन्।

निर्वाचन आयोगले नुवाकोट क्षेत्र नं. २ का लागि अधिकतम खर्च सीमा २९ लाख रुपैयाँ तोकेको छ।

हालसम्मको खर्च कटाउँदा बाँकी रहेको करिब २१ लाख ५ हजार ४३७ रुपैयाँको परिधिभित्रै रहेर आगामी अभियान सञ्चालन गर्न घलेले मतदाताहरूसँग स्वैच्छिक सहयोगको अपिल गरेका छन्।

उनले डिजिटल माध्यम बैंकको क्युआर कोडबाट प्राप्त हुने सानो सहयोगले पनि अभियानलाई कानुनी र पारदर्शी बनाउन ठूलो मद्दत पुग्ने उल्लेख गरेका छन्।

उम्मेदवार घलेले संकलित र खर्च भएको रकम कुल २९ लाख रुपैयाँ पुगेकै क्षणबाट चन्दा संकलन पूर्ण रूपमा बन्द गर्ने र एक रुपैयाँ पनि बढी नलिने कडा प्रतिबद्धता जनाएका छन्।

कानुनलाई कागजबाट व्यवहारमा उतार्ने यो अभ्यासले राजनीतिमा नयाँ संस्कारको सुरुवात गर्ने उनको विश्वास छ। भाषण भन्दा परिणाम र गफ भन्दा काममा जोड दिँदै उनले नुवाकोटको समृद्धिका लागि यो पारदर्शी यात्रामा साथ दिन सबैलाई आह्वान गरेका छन्।