१४ मङ्सिर, नुवाकोट। नेपालको एक महत्वपूर्ण पुरातात्विक सम्पदा नुवाकोटस्थित भैरवी मन्दिरको मूल गेटमा रहेका सिंहका मूर्तिहरूमा लगाइएको रङ्ग हटाउने कार्य अगाडि बढ्ने भएको छ। सम्पदाको मौलिकता जोगाउने उद्देश्यका साथ पुरातत्व विभागले यस सम्बन्धमा आवश्यक निर्देशन दिएको हो।

पुरातत्व विभागकी महानिर्देशक शौभाग्य प्रधानाङ्गले मन्दिरको प्रवेशद्वारमा रहेका चार ओटा सिंहमा लगाइएको रङ्ग तत्काल हटाउनका लागि औपचारिक निर्देशन दिएकी छिन्। विभागको यो कदमले ऐतिहासिक संरचनाहरूको मौलिक स्वरूप कायम राख्न जोड दिएको छ।

विभागबाट निर्देशन प्राप्त भएसँगै उक्त कार्य सम्पन्न गर्ने जिम्मा विदुर नगरपालिकाले लिएको छ। नगरपालिकाका नगरप्रमुख राजन श्रेष्ठले भैरवी मन्दिरको पुरातात्विक महत्वलाई ध्यानमा राख्दै विभागको निर्देशनअनुसार सिंहका मूर्तिबाट रङ्ग हटाउने कार्य चाँडै सुरु गरिने जानकारी दिएका छन्।

नगरपालिकाले अब पुरातत्व विभागको विशेषज्ञ टोलीसँग समन्वय गरी सिंहका मूर्तिलाई कुनै क्षति नहुने गरी सावधानीपूर्वक रङ्ग हटाउने तयारी गरेको छ।

भैरवी मन्दिर नुवाकोट दरबार क्षेत्रको एक प्रमुख लिच्छविकालीन तथा मल्लकालीन सम्पदा हो । वि.सं. २०७२ सालको विनाशकारी भूकम्पपछि पुनर्निर्माण गरिएको थियो । मौलिकतामा आँच आउने गरी सम्पदामा गरिने जथाभावी रङ्गरोगन वा परिमार्जनलाई रोक्न पुरातत्व विभागले नियमित अनुगमन गर्दै आएको छ।