जेठ १५, विदुर । राष्ट्रिय गणतन्त्र दिवसको अवसरमा नुवाकोटमा विविध कार्यक्रमको आयोजना गरी मनाईएको छ ।

जिल्ला मूल समारोह समितिले आयोजनामा विदुर नगरपालिकाको बट्टारदेखि सदरमुकाम विदुरस्थित लोकतान्त्रिक चौतारोसम्म पन्चेबाजासहित प्रभातफेरी गरिएको थियो । प्रभातफेरीमा जनप्रतिनिधि, कर्मचारी, पत्रकार, नागरिकहरुको सहभागिता रहेको थियो ।

समितिकै आयोजनामा रक्तदान र स्वास्थ्य जाँच गरिएको थियो । नेपाल रेडक्रस सोसाईटी नुवाकोटको सहजीकरणमा भएको रक्तदानमा २० जनाले रगत दान गरेको थियो । रक्तदानमा महिला पाँच र पुरुष १५ जनाले रक्तदान गरेका थिए ।

त्रिशूली अस्पतालको सहजीकरणमा भएको स्वास्थ्य परीक्षणमा मधुमेह र रक्तचापको जाँच गरिएको थियो ।

यसैगरी, बागमती प्रदेशस्तरीय राष्ट्रपति रनिङ शिल्डमा नुवाकोटबाट छनौट (विजयी) भएका एकसय १२ खेलाडीहरुलाई विदाई गरेको थियो ।

शिवपुरी गाउँपालिकाले प्रसाशनिक कार्यालयदेखि शेराबगर प्रहरी चौकीसम्म प्ले कार्डसहितको प्रभातफेरी गरेको थियो। साथै कृषि उपज संकलन केन्द्रमा गणतन्त्र दिवस २०८२ का सन्दर्भमा अन्तरक्रिया कार्यक्रम गरको थियो।