आत्महत्याको कारण मानसिक राेगका बिरामी बढी

नुवाकोट – नेपालमा हुने आत्महत्याका घटनाबाट सबैभन्दा बढी प्रभावित हुनेमा मानसिक राेगका बिरामी रहेको नेपाल प्रहरीले गरेको अध्ययनले देखाएको छ ।

नेपाल प्रहरी अस्पतालका चिकित्सक सम्मिलित टोलीले एक वर्ष लगाएर गरेको अध्ययनपछि तयार ‘आत्महत्या न्यूनिकरण तथा व्यवस्थापन सम्बन्धी अध्ययन प्रतिवेदन, २०८१’ मा आत्महत्याबाट प्रभावितमध्ये ३८.८ प्रतिशत मानसिक राेगका बिरामी रहेको उल्लेख छ ।

आत्महत्या गर्नुको मुख्य कारणहरुमा मानसिक रोगपछि मानसिक तनावमा २७.८ प्रतिशत, प्रेम सम्बन्धितमा ८.२ प्रतिशत, आर्थिक समस्यामा ८ प्रतिशत, दीर्घ रोगमा ७.५ प्रतिशत, लागुपदार्थ सेवनमा ४.७ प्रतिशत, मादकपदार्थ सेवनमा २.८ प्रतिशत र अन्यहरूमा शारिरीक अपाङ्गता, अनैतिक सम्बन्ध, बेरोजगारी आदि रहेको देखिएकाे छ । जसमा सबैभन्दा बढी मानसिक रोग र सबैभन्दा कम शारिरीक अपाङ्गताका कारणले गर्दा आत्महत्या हुने देखिएकाे छ ।

यस्तै, बारहरूको आधारमा आत्महत्याको घटनामा सबैभन्दा बढी शुक्रबार र सोमबार आत्महत्या हुने देखिएकाे छ ।

प्रतिवेदनअनुसार झुण्डिएर आत्महत्या गर्ने बढी रहेकाे तथ्याङ्क छ । ८३.५ प्रतिशतले झुण्डिएर र १५ प्रशितले विष सेवन गरेर आत्महत्या गरेका छन् । आत्महत्याका १० हजार २४७ घटनामा सुसाइड नोट फेला परेनन् भने १.४ प्रतिशत १४२ जनाको मात्र सुसाइड नोट फेला परेको अध्ययन प्रतिवेदनमा उल्लेख छ ।