नुवाकोट र धादिङका आठ उत्कृष्ट करदाता सम्मानित

गल्छी – करदाता सेवा कार्यालय गल्छीले नुवाकोट र धादिङका आठ उत्कृष्ट करदातालाई सम्मान गरेको छ ।

बिहीबार १२औं राष्ट्रिय कर दिवस २०८० का अवसरमा सञ्चालित कर सप्ताह समापन समारोहमा गल्छी गाउँपालिकाका अध्यक्ष केदार खतिवडाले विभिन्न क्षेत्रका उत्कृष्ट करदातालाई सम्मान गरेका हुन्।

“स्वच्छ, पारदर्शी र प्रविधिमैत्री कर प्रशासन, सामाजिक न्याय, आर्थिक समृद्धि र सुशासन” मूल नारा रहेको यस वर्षको कर दिवसको अवसरमा आर्थिक वर्ष ०७९/८० मा उद्योग, व्यापार, शैक्षिक र वित्तीय क्षेत्रका सबैभन्दा बढी आयकर दाखिला गर्ने करदाता संस्थालाई सम्मान गरिएको कार्यालयका प्रमुख शिखा वाग्लेले जानकारी दिईन् ।

सम्मानित हुनेमा नुवाकोटका उद्योगतर्फ हाम्रो अक्सिजन प्रालि, व्यापारतर्फ स्पीड अटो इन्टरप्राइजेज्, शैक्षिकतर्फ अर्किड एकेडेमी र वित्तीयतर्फ दुईपिपल महिला साना किसान कृषि सहकारी संस्था लिमिटेड रहेका छन् । यस्तै, धादिङका उद्योगतर्फ आरआर फर्म प्रालि, व्यापारतर्फ विके इन्टरप्राइजेज्, शैक्षिकतर्फ चिल्ड्रेन पार्क एकेडेमी र वित्तीयतर्फ भैरवी बचत तथा ऋण सहकारी संस्था लिमिटेड सम्मानित भएका छन्।

सो अवसरमा कार्यालयमा कार्यरत कर्मचारी पुरुषोत्तम खतिवडालाई उत्कृष्ट कर्मचारीका रुपमा पुरस्कृत गरिएको छ ।

कर दिवसको अवसरमा कार्यालयले गल्छी गाउँपालिकामा प्रभातफेरी र धुनेबेंसी नगरपालिकामा कर शिक्षा कार्यक्रम गरिएको कार्यालय प्रमुख वाग्लेले जानकरी दिईन् ।