विदुर – चान्द्रमास अनुसार प्रचलनमा रहेको मौलिक नेपाल संवत्को नयाँ वर्ष ११४४ आज विभिन्न कार्यक्रम गरी देशभर मनाइएको छ ।
नयाँ वर्षको खुसीयालीमा आज नुवाकोटका विभिन्न स्थानमा शुभकामना प्रभातफेरी निकालिएको छ । नेवार समुदायको बाहुल्यता रहेका स्थान नुवाकोट, बट्टार लगायतमा मौलिक भेषभुषासहित सांस्कृतिक झाँकीयुक्त शुभकामना प्रभातफेरी निकालिएको हो । नुवाकोट भैरवी मन्दिर परिसरमा मण्डला बनाएर नेपाल सम्वतलाई स्वागत गरिएको स्थानीय महेन्द्र श्रेष्ठले बताए ।
यस्तै, बट्टारका नेवार समुदायले पुरानो पाटीदेखि कोलनीको पिपलटारसम्म मोटरसाइकल र्याली गरिएको छ ।
यस संवतलाई हाल नेवार समुदायले नयाँ वर्षका रुपमा मनाउने गरेका छन् । राष्ट्रिय विभूति शङ्खधर साख्वाले विसं ९३७ (इसं ८८०) मा गरिब जनताको ऋण मोचन गरी नेपाल संवत्को सुरुआत गराएका थिए । नेपाल संवतले पृथ्वीनारायण शाहको शासनकालसम्म राष्ट्रिय संवतको मान्यता पाएको थियो ।
विसं २०६५ मा प्रधानमन्त्री पुष्पकमल दाहालले नेपाल संवत्ले राष्ट्रिय मान्यता पाउने घोषणा गरेका थिए । कार्तिक कृष्ण औँसीका दिन बही खाता बन्द गरी नयाँ वर्ष अर्थात कार्तिक शुक्ल प्रतिपदाका दिन नयाँ बही खाताको सुरुआत गर्ने परम्परासमेत काठमाडौँमा अझै छ । आजैदेखि सरकारले सरकारी कागजातमा नेपाल संवत् पनि उल्लेख गर्ने निर्णय गरेको छ । यो निर्णय आजैदेखि कार्यान्वयन भएको जनाइएको छ ।
प्रतिक्रिया