अपी हिमालको पर्यटन प्रवर्द्धनमा निर्मित ‘आए म त’ बोलको गीत म्युजिक भिडिओ सार्वजनिक भएको छ । दार्चुला जिल्लामा पर्ने सुदूरपश्चिमको सबैभन्दा अग्लो हिमशृङ्खला अपी हिमालमा पहिलोपटक छायाङ्कन गरिएको हो ।

करिब ७,१३२ मिटर उचाई रहेको अपी हिमालको बेस क्याम्पमा पुगेर भिडिओलाई कलाकार एबम निर्देशक राजु भट्टले तयार गरेका हुन् ।

स्थानीय पश्चिमी भाका रहेको गीतमा राजु भट्ट र ममता गुरुङको स्वर रहेको छ । म्युजिक नेपालको युट्युब च्यानलमार्फत सार्वजनिक भएकोमा कलाकार भट्टको आफ्नै शब्द, संगीत र मानश्वी मालाकारको संगीत संयोजन रहेको छ ।

भिडिओमा काठमाण्डौको वसन्तपुरदेखि दार्चुलाको अपी हिमालसम्मको मनमोहक दृश्यहरु देख्न सकिनेछ ।

धनगढीकी स्थानिय कलाकार बोन्दिता धामी र दार्चुला अपीका स्थानियको साथमा राजु भट्टको अभिनय रहेको भिडिओले नेपालको प्राकृतिक सौन्दर्यता र गाउको जनजीवनलाई एउटा दरिलो श्रव्यदृश्यमार्फत प्रस्तुत गरेको छ ।

सिनेमाटोग्राफरद्वय केशव पाण्डे र निर्देशक भट्टको एउटा अथक मेहनतबाट तयार भिडिओ हेर्दा दार्चुलाको अपी क्षेत्रलगायत समग्र नेपालको पर्यटनको छेत्रको लागि एउटा कोसे ढुंगाको काम गर्ने देखिन्छ ।