राष्ट्रिय परिचय पत्रका लागि नुवाकोटमा ५९ हजारको विवरण संकलन

विदुर – राष्ट्रिय परिचय पत्रका लागि पछिल्लोपटक नुवाकोटमा ५९ हजार बढीको विवरण दर्ता भएको छ । जिल्लाका नौ स्थानीय तहमा राष्ट्रिय परिचय पत्र विवरण दर्ता संकलन कार्य सम्पन्न हुँदा ५९ हजार ६२९ जनाको विवरण संकलन भएको प्रमुख जिल्ला अधिकारी सुरेन्द्र पौडेलले बताए ।

जिल्ला प्रशासन कार्यलय विदुरबाट गरिएको सेवालाई शिविरको रुपमा स्थानीय तहबाट राष्ट्रिय परिचय पत्र विवरण दर्ता संकलन कार्यलाई तीव्र पारिएको हो ।

जिल्लाका बेलकोटगढी, म्यागङ, दुप्चेश्वर, किस्पाङ, तारकेश्वर, सुर्यगढ़ी, लिखु, तादी र शिवपुरीमा दर्ता संकलन कार्य गरिएको छ। जसमा तादी र शिवपुरी गाउँपालिकामा विवरण संकलन कार्य जारी रहेको छ ।

जसअनुसार बेलकोटगढी नगरपालिकामा १५ हजार ७९० जनाको विवरण दर्ता संकलन गरिएको छ ।

त्यस्तै, म्यागङ गाउँपालिकामा छ हजार १२, दुप्चेश्वर गाउँपालिकामा आठ हजार ७३८, किस्पाङ गाउँपालिकामा पाँच हजार ३८५ जनाको विवरण दर्ता संकलन गरिएको जिल्ला अधिकारी पौडेलले जानकारी दिए ।

त्यस्तै तारकेश्वर गाउँपालिकामा आठ हजार २४९, सुर्यगढी गाउँपालिकामा छ हजार ८४७, लिखु गाउँपालिकामा छ हजार ६३५, तादी गाउँपालिकामा एक हजार ८१० र शिवपुरी गाउँपालिकामा १६३ जनाको विवरण दर्ता संकलन गरिएको छ ।

संकलन कार्यको लागि एउटा स्थानीय तहमा १५ दिनसम्म संकलन गरिने जिल्ला प्रशासन कार्यालय नुवाकोटले जनाएको छ ।