विदुर, नुवाकोट – सरकारले सुरु गरेको सामाजिक स्वास्थ्य सुरक्षा (स्वास्थ्य बीमा) कार्यक्रमअन्तर्गत नुवाकोट जिल्लाको विदुर नगरपालिका वडा नम्बर १ मा सुरु भएको छ।
राष्ट्रिय स्वास्थ्य बिमा कार्यक्रम अन्तर्गत परिवारका ५ जनासम्मले ३ हजार ५ सय रुपैयाँ तिरेर एक वर्षका लागि बिमाअन्तर्गत उपचार सेवा लिन भएकोले आफुले परिवारसहित स्वास्थ्य बीमा गरेर वडामा सुरुवात गरेको वडाध्यक्ष लेनिन रञ्जितले बताए । स्वास्थ्य बीमाबाट ओपीडी सेवा, इमर्जेन्सी, ल्याब उपचार, सामान्य अपरेशन लगायत ७० प्रकारका रोगहरुका निशुल्क औषधी र उपचार सेवा प्राप्त गर्न सकिने भएकोले बीमा योजनाबाट सम्पूर्ण वडाबासीहरुले सेवा लिन अनुरोध गरे ।
स्वास्थ्य बीमा गराउँदा एक लाख रुपियाँसम्मको उपचारको व्यवस्था भएपछि मुटु, मिर्गौला, मधुमेह, उच्च रक्तचापलगायत रोगका बिरामीलाई उपचार गर्न धेरै सजिलो हुने विदुर नगरपालिका वडा नम्बर १ का स्वास्थ्य बीमा सहयोगी अनिमा श्रेष्ठले बताईन् । विशेष गरी उपचारमा सहुलियत र कडा किसिमको रोगको उपचारमा कम खर्च लाग्ने भएपछि स्वास्थ्य बीमा प्रभावकारी रहेको उनीले बताईन् ।
जिल्लाका १२ वटै स्थानीयका ८८ वटै वडाहरुमा १/१ जना स्वास्थ्य बीमा सम्बन्धी सदस्यता दर्ता प्रतिनिधिहरु छन् ।
नुवाकोटमा स्वास्थ्य बिमा लागू, स्वास्थ्य बीमा नियमावलीसहित
स्वास्थ्य बीमा सदस्यता प्रक्रिया चार चक्रमा रहेको छ। वैशाख, जेष्ठ र असारको लागि भदौ महिनाको १ गते सेवा क्रियाशील हुनेछ भने साउन, भदौ र असोजको लागि मङ्सिर १ गते सेवा क्रियाशील अवधि कार्यक्रमको सेवा सुरु हुनेछ। यस्तै कार्तिक, मङ्सिर र पुसको लागि फाल्गुण १ र माघ, फाल्गुण र चैत्रको लागि जेष्ठ महिनाको १ गतेबाट सेवा क्रियाशील अवधि कार्यक्रमको सेवा सुरु हुनेछ।
स्वास्थ्य बीमा गरेपछि नुवाकोटमा जिल्ला (त्रिशुली) अस्पताल, खरानीटार, ककनी र देउराली अस्पतालबाट आवश्यक कागजात देखाएर ओपीडी सेवा, इमर्जेन्सी, ल्याब उपचार, सामान्य अपरेशन लगायत ७० प्रकारका रोगहरुका निशुल्क औषधी र उपचार सेवा प्राप्त गर्न सक्नेछन् ।
प्रतिक्रिया