विदुर, भूकम्पका कारण हिउँपहिरो गएसँगै ठप्प लाङटाङ्गको पर्यटनमा विस्तारै चहलपहल सुरु भएको छ । वैशाख १२ र २९ को भूकम्पले लाङटाङ्ग हिमाल हल्लाएर गाउँ नै सखाप परेको थियो ।
हिमपहिरोबाट बचेका स्थानीयवासीले पर्यटन क्षेत्रलाई फेरि पहिलेकै अवस्थामा फर्काउने जमर्को गरेका छन् । लाङटाङ्ग मध्यवर्ती क्षेत्र उपभोक्ता समिति र जिल्ला विकास समिति रसुवाको सहयोगमा गोरेटो बाटो बनाइएपछि फाट्टफुट्ट पर्यटक आउन थालेका छन् । अहिले लाङटाङ्ग घुम्न स्वदेशी र विदेशी गरी दैनिक १० जना जति पर्यटक आउने गरेका छन् ।
दुई साताअघि लाङटाङ्ग खोला किनार स्याफ्रुबेसीं (पैरे–दोभान–बेम्बो) रिम्चेसम्मको गोरेटो खोलिएको सुप्पा तामाङले बताए ।
पहिले स्याफ्रुबेसीबाट वृद्धिमको खाम्जिङ, सुर्का उकालो पैदल हिँड्दै शेर्पागाउँ हुँदै रिम्चेसम्म पुग्नु पथ्र्याे । बाटो खुलेसँगै दोभान र बेम्बोमा एकरएकवटा होटल खुलेका छन् । त्यसैगरी रिम्चे र लामाहोटल (चान्धम) मा पनि होटलहरू खुलेका छन् । सिन्धुम र क्यान्जिनमा अझ बढी होटल खुलेको पाल्साङले बताए ।
क्यान्जिनमा मात्रै ३० र ३५ वटा होटल सञ्चालनमा आएका छन् । होटल र स्थानीयवासीलाई चाहिने खाद्यान्न र निर्माण सामग्री खच्चडले ढुवानी गर्न थालेको छ ।
भूकम्पले लाङटाङ हिमाल हल्लिँदा गएको हिउँपहिरोमा परेर स्वदेशी र विदेशी गरी २ सय १० जनाको मृत्यु भएको थियो । त्यो हिउँपहिरामा परेर पुरिएकामध्ये अहिलेसम्म २९ जनाको मात्र कंकाल भेटिएको छ । ५३ जना अझै बेपत्ता छन् ।
बेपत्ताको सूचीमा लाङटाङ्ग राष्ट्रिय निकुन्ज सुरक्षार्थ खटिएका नारायण दल गणका १० जनासमेत छन् ।
प्रतिक्रिया