१४ पुस, नुवाकोट । रुपिनदेवी बचत तथा ऋण सहकारी सस्था लिमिटेडको १२औं वार्षिक साधारणसभा शनिबार सम्पन्न भएको छ ।

प्रतिवेदनअनुसार गत आर्थिक वर्ष २०८०/०८१ मा संस्थाका पदाधिकारी, सदस्य र लेखा समितिका सदस्यहरुले २२ लाखभन्दा बढी ऋण लिएको छ । संस्थाको जगेडा कोष ३ लाख १३ हजार ९७३ रुपैँया रहेको छ ।

साधारणसभाको नुवाकोट उद्योग वाणिज्य सङ्घ नुवाकोटका वरिष्ठ उपाध्यक्ष सन्तोष उप्रेतीले उद्घाटन गरेका थिए ।

कार्यक्रमलाई सम्बोधन गर्दै वरिष्ठ उपाध्यक्ष उप्रेतीले लगानी डुब्दा संस्था धरासायी हुने भएकोले पूँजीगत लगानीमा ध्यान दिनुपर्ने बताए । धितो मुल्याङ्कन समितिले सुक्ष्म अध्ययन गरेर मात्र ऋण लगानी प्रवाह गर्नुपर्ने विचार राखेका छन् ।

संस्थाका अध्यक्ष रोशन शाहका अनुसार संस्थाको सेयर पुँजी १ करोड १५ लाख २९ हजार १०० रुपैँया रहेको छ । महिला १७६ जना र पुरुष ३४३ जना रहेको संस्थाले ५ करोड ४३ लाख २९ हजार ७०५ रुपैँया बचत सङ्कलन गर्न सफल भएको उनले जानकारी दिए ।

संस्थाले व्यवसायिक कर्जामा १ करोड २४ लाख ३८ हजार ३९३ रुपैँया, व्यक्तिगत कर्जामा ५९ लाख २५ हजार ८४५ रुपैँया र आवधिक कर्जामा १७ लाख ७० हजार रुपैँया ऋण लगानी गरेको छ ।

संस्थाले आव २०८०/०८१ मा कम दैनिक बचत गरेको छ । १५ लाख ८१ हजार ८४० रुपैँया दैनिक बचत गरेकोमा आव २०७९/०८० मा १९ लाख १४ हजार २८६ रुपैँया दैनिक बचत सङ्कलन गरेको थियो।

कार्यक्रममा बेगबहादुर सुनार उत्कृष्ट बचतकर्ता र कुमार विक उत्कृष्ट ऋणीलाई सम्मान गरिएको थियो ।

यस्तै, संस्थाले शैक्षिकसत्र २०८०मा एसइईमा उत्तीर्ण सेयर सदस्यहरुमध्येका रनिशा सुनार, अञ्जिल कार्की र सिम्रीका रिजाललाई सम्मान प्रदान गरिएको थियो।