साउन १४, नुवाकोट । नेपालमा चलचित्र हेर्ने परम्परा समयसँगै बदलिएको छ। विगतमा सिनेमा हलको काउन्टरमा घण्टौँसम्म लामो लाइन बसेर कागजी टिकट काट्ने परिपाटीलाई विस्थापित गर्दै आजभोलि डिजिटल प्रविधिले प्राथमिकता पाएको छ।

आधुनिक समयमा दर्शकहरूले खल्ती, ईसेवा जस्ता डिजिटल वालेट वा विभिन्न सिनेप्लेक्सका आधिकारिक मोबाइल एप र वेबसाइटमार्फत घरमै बसेर आफूलाई मनपर्ने शो र सिट छनोट गरी अनलाइन बुकिङ गर्न सक्छन्।

नेपालका प्रमुख सहरदेखि साना बजारसम्मका मल्टिप्लेक्सहरूमा अत्याधुनिक ४के तथा २के डिजिटल प्रोजेक्सन, डल्बी एटमस साउन्ड सिस्टम, वातानुकूलित (एसी) हल र सुविधायुक्त आरामदायी सिटको व्यवस्थाले चलचित्र हेर्ने अनुभवलाई थप गुणस्तरीय र मनोरञ्जनात्मक बनाएको छ। डिजिटल साक्षरता र स्मार्टफोनको पहुँच बढेसँगै युवा पुस्ता मात्र नभई सम्पूर्ण परिवार नै डिजिटल माध्यमबाट अग्रिम टिकट सुरक्षित गरी सिनेमा हलसम्म पुग्ने परिपाटी दैनिक जस्तै बनेको छ।

मोफसलको सिनेमा इतिहासलाई नियाल्दा नुवाकोट जिल्लाको चलचित्र संस्कृति पनि निकै रोचक र उतारचढावपूर्ण रहेको छ। कुनै समय नुवाकोटको बट्टार र त्रिशूली क्षेत्रमा सञ्चालित वनदेवी चलचित्र मन्दिर स्थानीय बासिन्दाका लागि मनोरञ्जनको मुख्य केन्द्र थिए। प्रविधिको स्तरोन्नति हुन नसक्नु, भौतिक पूर्वाधारको कमी र परिवर्तित दर्शकको चाहनाअनुसार आफूलाई ढाल्न नसक्दा यी पुराना हलहरू क्रमैसँग बन्द हुन पुगे। त्रिशूली चलचित्र हल संचालनमा नआउँदै बन्द भए ।

यस्तै परिस्थितिबिच बट्टारमा स्थापना भएको जगदम्बा चलचित्र मन्दिरले लामो समयसम्म नुवाकोटे दर्शकलाई चलचित्र देखाए। सिंगल स्क्रिन हलका रूपमा सञ्चालित जगदम्बाले स्थानीयस्तरमा परिवार र साथीभाइसँग फिल्म हेर्ने बलियो संस्कृति निर्माण गरेको थियो, जहाँ नयाँ नेपाली तथा हिन्दी चलचित्रहरू हेर्न दर्शकहरूको बाक्लो घुइँचो लाग्ने गर्दथ्यो।

प्रविधिमा आएको रूपान्तरण र आधुनिक सुविधाप्रतिको दर्शकको मोहलाई सम्बोधन गर्दै पुरानो ऐतिहासिक जगदम्बा हलको स्थानमा नयाँ संरचना खडा गरी शिवालय सिनेप्लेक्स सञ्चालनमा छ। विदुर नगरपालिका वडा नम्बर ४ बट्टारमा अवस्थित यो हल अत्याधुनिक २४० सिट क्षमता, उच्चस्तरीय डिजिटल प्रोजेक्सन, डल्बी साउन्ड, र वातानुकूलित वातावरणसहित सञ्चालनमा आएको हो।

गत आर्थिक वर्ष २०८२/८३ मा विदुर नगरपालिकामा करिब एक लाखभन्दा बढी मनोरन्जन कर तिरेको शिवालय सिनेप्लेक्सले नुवाकोट लगायत, रसुवा र धादिङका दर्शकहरुलाई बलिउडदेखि कलिउडस्तरको सिनेमा पस्कँदै आईरहेको संचालक सन्तोष अधिकारी बताउँछन् ।

स्थानीय युवा उद्यमीहरूको लगानी र चलचित्र विकास बोर्डको पहलमा पुनर्जीवन पाएको यस सिनेप्लेक्सले बक्सअफिससहित डिजिटल टिकटिङको सुविधा समेत उपलब्ध गराएको छ।

वनदेवी र जगदम्बाको पुरानो सम्झना बोकेकादेखि डिजिटल युगका नयाँ पुस्ताकासम्मलाई शिवालय सिनेप्लेक्सले एउटै छानामुनि जोडेको छ।

आधुनिक प्रविधि र आरामदायी वातावरणका कारण अहिले नुवाकोटमा चलचित्र संस्कृतिले पुनः नयाँ गति लिएको छ र स्थानीय दर्शकहरूले सिनेमा अनुभव प्राप्त गरिरहेका छन्।