१२ चैत, नुवाकोट । शिवपुरी गाउँपालिका–३ गौजेनीस्थित मैदानबाट लप्से जाने भित्री सडकखण्डमा स्काईभेक्टरले बाटो खन्ने क्रममा माथिबाट पहिरो खस्दा दुई जनाको मृत्यु भएको छ।

मङ्गलबार चैत ११ गते दिउँसो करिब २ बजेर १० मिनेटको समयमा सडक निर्माणका लागि स्काईभेक्टरले बाटो खन्ने क्रममा माथिबाट ठूलो ढुङ्गासहितको पहिरो खसेको जिल्ला प्रहरी कार्यालय नुवाकोटका सूचना अधिकारी बीरबहादुर बुडाऐरले जानकारी दिए ।

उनका अनुसार पहिरोमा परी शिवपुरी गाउँपालिका–३ निवासी करिब ३५ वर्षीय फुलमान तामाङको घटनास्थलमै मृत्यु भएको हो ।

साथै उक्त घटनामा स्काईभेक्टर चालक ललितपुर निवासी २४ वर्षीय अमृत तामाङ पहिरोले पुरिएको मृत्यु भएको प्रहरीले जनाएको छ ।

बागमती प्रदेश सरकारको करिब ९ लाख रुपैयाँ लागतको योजना अन्तर्गत पूर्वाधार विकास कार्यालय नुवाकोटसँग सम्झौता गरी उपभोक्ता समितिमार्फत काम भइरहेको शिवपुर गापा-३ का अध्यक्ष नाती तामाङले जानकारी दिए ।

घटनास्थलमा नेपाली सेना, नेपाल प्रहरीको टोली, स्थानीयबासीहरु उद्धारमा खटेका थिए ।