नुवाकोटमा बाढी पहिरोमा परी एकको मृत्यु

विदुर – नुवाकोटमा अविरल वर्षापछिकाे बाढीपहिरोमा परी एक जनाको मृत्यु भएकाे छ । बाढी पहिराेमा परी एक घाईते र पशुपन्छीमा क्षति पुगेको छ ।

असोज १२ गते अन्दाजी ४ बजेर ३० मिनेटमा लिखु गाउँपालिका-५ शेराको मुहानस्थित लिखु खोलाले बगाई ल्याएको किनार लगाई बगरममा एक पुरुषको लास फेला परेको नुवाकोट जिल्ला प्रहरी कार्यालयका प्रहरी नायव उपरीक्षक तीलक भारतीले जानकारी दिए । मृत लासको पहिचान नखुलेको र सनाखतको लागि त्रिशूली अस्पतालको शवगृहमा राखिएको उनले जानकारी दिए ।

आगलागीबाट १ हजार ३५० चल्ला जले

पञ्चकन्या गाउँपालिका-५ मा गिरी टोलस्थित दिपक गिरीले सञ्चालन गरेको कुखुरा फर्ममा आगलागी भएको थियो ।

बेलकोटगढी नगरपालिक-७ केउरीपानीस्थित भुवनेश्वर खतिवडाको ढुङ्गा र माटोले बनेको दुईतले घर पहिरोले पुरी पूर्णरुपमा क्षति भएको थियो। उनले पालेको चारवटा बाख्रा र दुईवटा गाई मरेको थियो । यस्तै, पहिरोमा परी सरस्वती खतिवडाको निधारमा चोट लागेको लागि सामान्य घाईते अवस्थामा उद्दार गरी उपचारको लागि त्रिशूली अस्पताल पठाईएको थियो ।

ककनी गाउँपालिका-४ सिस्नेरीस्थित सविना तामाङको ढुङ्गा माटोले बनेको जस्ताले छाएको एकतले घर अविरल वर्षाको कारण पहिरो आई घर पूर्णरुपमा क्षति भएको थियो । घरभित्र रहेको लत्ताकपडा, अन्नपात तथा भाडाँकुडाँ पुरिएको थियो भने कुनै पनि मानवीय तथा चौपायामा क्षति पुगेको थिएन । यस्तै, १ नम्बर वडाको आठमाइलस्थित पासाङल्हामु राजमार्गखण्डमा बिहान ९ बजेतिर पहिरो आई बाटो दुवैतर्फ अवरोध भएको थियो ।

किस्पाङ गाउँपालिका-५ पहिरेवेंशीस्थितमा डाँडाथोकका सुबबहादुर तामाङले सञ्चालन गरेको रिभरसाईड रिसोर्ट एण्ड रेष्टुरेण्ट अविरल बर्षाको कारण त्रिशुली नदिमा आएको बाढीले आधा भवन बगाएर लगेको थियो ।

बेलकोटगढी नगरपालिका-७ तारुका चेकपोष्ट अगाडी अविरल वर्षाको कारण माथिबाट आएको लेदोमाटोको पहिरोले स्थानीय प्रेमबहादुर राईको दुई तल्ला पक्कि घरमा सञ्चालन गरेको किराना पसल र दुध डेरी पहीरोले पुरेको थियो। यस्तै, ९ नम्बर वडाको सिउरेनीका सन्तबहादुर तामाङको ढुङ्गा, माटो र जस्ताले छाएको एक तले कच्ची घर पहिरोले क्षति गरेको थियो ।

नुवाकोट जिल्लाका विभिन्न स्थानमा करिब एक दर्जनजति सवारीसाधनहरु पहिरोले पुरेको प्रहरीले जनाएको छ।