“नगरपालिकाले पर्यावरण संरक्षणलाई प्राथमिकतामा राखेको छ”: उप्रमुख बोगटी

नुवाकोट – विदुर नगरपालिकाका उपप्रमुख प्रभा बोगटीले नगरपालिकाले पर्यावरण संरक्षणलाई प्राथमिकतामा राखेको बताईकी छिन् ।

सोमबार ग्रीनलाइन नेपाल संस्थाले विदुरमा आयोजना गरेको एकदिने स्वास्थ्य र वातावरण सम्बन्धि क्षमता अभिवृद्धि प्रशिक्षणलाई सम्बोधन गर्दै उपप्रमुख बोगटीले उक्त जानकारी दिएकी हुन् ।

कार्यक्रममा उपप्रमुख बोगटीले पहिलो चरणमा नगरपालिकाले सामुदायिक वनकर्मीहरुको अभिमुखीकरण तालिम गरिसकेको जानकारी समेत दिईन् । वनजङ्गललाई मानवको जीवनसङ्ग जोड्नुपर्ने छ । वनजङ्गल र खुल्ला क्षेत्रमा फलफुलका बिरुवा रोपी आयआर्जन गर्न र वन्यजन्तुबाट पनि जोगिन सक्ने बताईन् ।

“सामुदायिकस्तरमा वन संरक्षणमा महिलाहरुको ठुलै भूमिका रहेको छ”, उपप्रमुख बोगटीले भनिन् “वातावरणीय स्वास्थ्य तथा स्वास्थ्जन्य फोहोरमैला व्यवस्थापनको लागि नागरिक आफै जागरुक हुनुपर्नेछ । वन जङ्गलमा डढेलो लाग्दा श्वासप्रश्वासमा समस्या आईरहेको छ ।”

उपप्रमुख बोगटीले विकास निर्माणमा प्रयोग भएका सिमेन्टका बोरा तथा अन्य प्लास्टिकजन्य सामग्रीहरुलाई उचित व्यवस्था गरी पर्यावरण कायम राख्न सामुदायिक वनका उपभोक्ता लाग्नुपर्ने बताईन् ।

सामाजिक विकास मन्त्रालय बागमती प्रदेशको आर्थिक सहयोग रहेको प्रशिक्षणमा नुवाकोट जिल्लाका ४० जना महिलाहरुको सहभागिता रहेको संस्थाका अध्यक्ष सुवास पाण्डेले जानकारी दिए ।

प्रशिक्षणमा वन डिभिजन कार्यालयका वन अधिकृत कमल घिमिरे, विदुर नगरपालिकाका फाेहाेर मैला तथा वातावरण शाखाका प्रमुख सुबास पाण्डे र स्वास्थ्यकर्मी गरिमा जोशीले सहजीकरण गरेका थिए ।