नुवाकोट – विदुर नगरपालिकाले २०औँ राष्ट्रिय महिला सामुदायिक स्वास्थ्य स्वयंसेविका दिवस मनाएको छ । दिवसकै अवसर मृत्युपछि राधिकासहित १३ महिला स्वास्थ्यस्वयंसेविका सम्मान गरेको छ । ‘स्वास्थ्य क्षेत्रमा दिगो विकास, महिला सामुदायिक स्वास्थ्य स्वंयसेविकाको संयुक्त प्रयास’ नाराका साथ मनाईएको हो ।

कार्यक्रममा वडा नम्बर ३ खड्गभञ्ज्याङ्ग स्वास्थचौकी मातहतका महिला सामुदायिक स्वास्थ्य स्वयंसेविका राधिका श्रेष्ठलाई मृत्युपछि पनि सम्मान गरिएको स्वास्थ्य प्रमुख पूर्णध्वज श्रेष्ठले जानकारी दिए । उनको गत भाद्रमा उपचारको क्रममा निधन भएको थियो ।

समग्र नगर र वडाको स्वास्थ्य क्षेत्रमा पुर्याएको योगदानको कदर गर्दै नगरका सबै वडाबाट १/१ जना महिला स्वास्थ्य स्वयंसेविकालाई दोसल्ला ओढाएर सम्मान गरिएको स्वास्थ्य प्रमुख पूर्णध्वज श्रेष्ठले जानकारी दिए ।

महिला स्वास्थ्य स्वयंसेविकाको कामको कदर र मनोबल उच्च राख्ने उद्देश्यका साथ दिवसको अवसरमा स्वास्थ्य नीति, महिला तथा बालबालिका स्वास्थ्य, खोप, नगर स्वास्थ्यलगायत नगरसम्बन्धि जानकारी दिन नगरपालिकाले हाजिरीजवाफ प्रतियोगिता आयोजना गरेको छ ।

प्रतियोगितामा १० नम्बर वडा महिला स्वास्थ्य स्वयंसेविका समुह प्रथम, ४ नम्बर वडा समुह द्वितिय र ५ नम्बर वडा समुह तृतीय भएका छन् । प्रतियोगितामा विजयी हुने प्रथम, द्वितीय र तृतीय हुनेले तीनहजार, दुईहजार र एकहजार रुपैयाँ नगद पुरस्कार र प्रमाणपत्र प्राप्त गरेको नगर स्वास्थ्य निरीक्षक रामराजा भण्डारीले जानकारी दिए ।

विजेतालाई विदुर नगरपालिकाकी उपप्रमुख प्रभा बोगटीले नगद पुरस्कार र प्रमाणपत्र वितरण गरिन् । कार्यक्रमलाई सम्बोधन गर्दै उपप्रमुख बोगटीले स्वास्थ्य क्षेत्रमा तल्लो इकाइमा रहेर महिला स्वास्थ्य स्वयंसेविकाको कार्यको प्रशंसा गरिन् । स्वयंसेवक भनेको निस्वार्थ भावले गरिने कार्य भएतापनि नगरको स्वास्थ्य नीति कार्यान्वयनमा ठुलो प्रभाव परेको उनले बताईन् ।

कार्यक्रममा नगरका एकसय ३९ महिला स्वास्थ्य स्वयंसेविकालाई झोला वितरण गरिएको छ ।

नेपालमा बालबालिका तथा मातृ मृत्यदर प्रभावकारी रूपमा घट्नुमा स्वास्थ्य स्वयंसेविकाको उल्लेखनीय भूमिका रहेको युनिसेफले जनाएको छ । महिला स्वास्थ्य स्वयंसेविकाको मुख्य काम महिला तथा बालबालिकाको क्षेत्रमा भएपनि कतिपय अवस्थामा स्वयंसेवकका रूपमा खटाउने गरिएको छ ।