नुवाकोट – नुवाकोट क्रिकेट संघको वार्षिक साधारणसभालाई सम्बोधन गर्दै विदुर नगरपालिकाका प्रमुख राजन श्रेष्ठले च्वाडीमा अन्तर्राष्ट्रिय क्रिकेट खेल मैदान बन्ने जानकारी दिएका छन् ।

नगरप्रमुख श्रेष्ठले नेपाल क्रिकेट संघ र जिल्ला संघको समन्वय र विद्यालय व्यवस्थापन समितिको सहकार्यमा नगरपालिकाले वडा नम्बर ५ मा रहेको च्वाडी माध्यमिक विद्यालयको ९० रोपनी जग्गामा क्रिकेट खेलमैदान निर्माण गरिने घोषणा गरेका छन् । प्रदेश सरकार र विद्यालयसँगको आवश्यकीय प्रक्रिया अघि बढाई सकेको नगरप्रमुख श्रेष्ठले जानकारी दिए । आफ्नो कार्यकालमा उक्त खेलमैदान निर्माण सम्पन्न गरिने नगरप्रमुख श्रेष्ठले प्रतिबद्धता व्यक्त गरे।

नगरप्रमुख श्रेष्ठले फुटबल, क्रिकेट, तेक्वान्दो लगायत अन्य खेलकुद विकासको लागि नगरले प्रबर्द्धन र सहयोग गर्दै आईरहेको बताए । युवालाई संगठित बनाएर परिचालन गर्न सके समग्र जिल्ला, राष्ट्रकै पहिचान हुने भएकोले खेलकुद विकासमा नगर अघि बढिरहेको बताए ।

चालुआर्थिक वर्षमा त्रिभुवन त्रिशुली माध्यमिक विद्यालयको खेलमैदानलाई पूर्णता दिन १५ लाख रुपैंयाँ बजेट विनियोजन गरिएको नगरप्रमुख श्रेष्ठले जानकारी दिए ।