नुवाकोट – राष्ट्रिय सूचना आयोगको आयोजना तथा जिल्ला प्रशासन कार्यालयको समन्वयमा विदुरमा सूचनाको हक सम्बन्धी अन्तरक्रिया कार्यक्रम भएको छ।
सोमबार भएको कार्यक्रममा आयोगका सचिव दिवस आचार्यले सूचनाको हक र व्यवहारिक प्रयोगका बारेमा सहजिकरण गरेका थिए । नेपालमा सूचनाको हकको अभ्यास, यसका सिद्धान्तहरु, सार्वजनिक निकायको दायित्व र सूचनाको संरक्षण, सूचनाको दुरुपयोग र सूचनाको हकका सन्दर्भमा चुनौतीहरु लगायतका विषयमा सहभागीहरुलाई जानकारी गराएका थिए ।
कार्यक्रममा आयोगका आयुक्त कमला ओली थापाले सूचनामा नागरिकको सरल र सहज पहुँच हुनुपर्नेमा जोड दिईन् ।
प्रमुख जिल्ला अधिकारी किरण थापाले नुवाकोटका सरकारी कार्यालयहरुले आगामी आवबाट प्रत्येक तीन/तीन महिनामा कार्यालयको गतिविधि प्रकाशन गर्न निर्देशन दिए ।
जिल्ला समन्वय समितिका प्रमुख जिल्ला समन्वय समितिका प्रमुख रजिन्द्र विक्रम सिंह ठकुरी, जिल्ला अधिकारी किरण थापालगायतको आतिथ्यमा भएको कार्यक्रममा जिल्लास्थित स्थानीय र सरकारीकार्यालयका प्रमुख तथा सूचना अधिकारीको सहभागिता रहेको थियो ।
कार्यक्रममा पत्रकार महासंघ जिल्ला शाखा नुवाकोटका अध्यक्ष कपिलदेव खनालले सूचनाको हक सम्बन्धि नीतिलाई सरकारी निकायका पदाधिकारी र आमनागरिकले हतियारको रुपमा लिएर दुरुपयोग गरेको बताए ।
कार्यक्रममा सहभागीहरुले जिल्लामा सरकारी कार्यालयहरुमा प्रष्टसँग नागरिक बडापत्र नराखिएको, नागरिकसँगको सरोकारका विषय, विकास निर्माणका योजनाहरुको विवरण योजनास्थलमा नराखिएको लगायतका विषयहरु उठान गरेका थिए ।
प्रतिक्रिया