२३ वैशाख, विदुर । अन्धकारमय जीवन बिताउन बाध्य नुवाकोटका २१८ जना नागरिकका लागि यो साता खुसीको नयाँ किरण उदाएको छ।
तिलगंगा आँखा प्रतिष्ठान, तिलगंगा सर्जिकल सामुदायिक आँखा केन्द्र र नेपाल रेडक्रस सोसाइटी नुवाकोटको संयुक्त पहलमा सञ्चालित विशेष शल्यक्रिया शिविरमार्फत जिल्लाका २१८ जना बिरामीको सफलतापूर्वक दृष्टि फर्काइएको हो।
गत बैशाख २१ र २२ गते आयोजित यस शिविरमा लामो समयदेखि मोतियाबिन्दु र आँखामा मासु पलाउने समस्याका कारण दृष्टि गुमाएका व्यक्तिहरूलाई लक्षित गरिएको थियो।
शिविरमा तिलगंगाका विशेषज्ञ नेत्ररोग डा. इन्दिरा पौडेलको टोली र स्थानीय प्राविधिकहरूको सक्रियतामा २१२ जनाको मोतियाबिन्दु र ६ जनाको आँखामा पलाएको मासुको सफल शल्यक्रिया गरिएको तिलगंगा सर्जिकल आँखा केन्द्र नुवाकोटका अध्यक्ष हरि श्रेष्ठले जानकारी दिए ।
जिल्लाका विभिन्न १२ स्थानमा सञ्चालित आँखा परीक्षण शिविरमा सहभागी भएका १ हजार ६ सय ६२ जना मध्येबाट ३१४ जनालाई शल्यक्रियाका लागि छनोट गरिएको केन्द्रका प्रमुख ताराबहादुर वाईबाले जानकारी दिए । तर, विविध कारणले शिविरमा २१२ जना मात्र उपचारका लागि उपस्थित भएको उनले जानकारी दिए । बाँकी रहेका १०० जना बिरामीलाई पनि सम्पर्कमा ल्याई छिट्टै अर्को शिविरमार्फत सेवा प्रदान गर्ने लक्ष्य राखिएको उनले बताए ।
लेखकको बारेमा
प्रतिक्रिया