२५ चैत, नुवाकोट । तिलगंगा आँखा प्रतिष्ठान गौशाला काठमाडौँ र तिलगंगा सर्जिकल सामुदायिक आँखा केन्द्र नुवाकोटको संयुक्त आयोजनामा नुवाकोटका विभिन्न स्थानहरूमा बृहत् आँखा शिविर सञ्चालन हुने भएको छ।

नेपाल रेडक्रस सोसाइटी नुवाकोट जिल्ला शाखाका उपशाखा र विभिन्न स्थानीय निकायहरूको सहकार्यमा हुने शिविर आगामी २०८३ साल बैशाख ३ गतेदेखि १६ गतेसम्म सञ्चालन हुने रेडक्रस सभापति हरि श्रेष्ठले जानकारी दिए । शिविरमा सहभागी हुने बिरामीहरूलाई नि:शुल्क आँखा परीक्षणका साथै आवश्यकता अनुसार नि:शुल्क औषधि र सहुलियत दरमा चस्मा वितरण गरिने उनले बताए ।

यस स्वास्थ्य अभियान अन्तर्गत पहिलो दिन बैशाख ३ गते पञ्चकन्या गाउँपालिकाको बानियाँटार स्वास्थ्य ईकाइबाट शिविर सुरु भई क्रमशः सूर्यगढी, तादी, म्यागङ, लिखु, किस्पाङ र बेलकोटगढी नगरपालिकाका विभिन्न स्थानहरूमा सञ्चालन गरिने तालिका रहेको छ।

शिविरमा छनौट भएका मोतियाबिन्दुका बिरामीहरूको आगामी बैशाख २१ र २२ गते विदुरमा रहेको तिलगंगा सर्जिकल सामुदायिक आँखा केन्द्रमा वरिष्ठ नेत्ररोग विशेषज्ञहरूद्वारा शल्यक्रिया गरिने कार्यालय प्रमुख समुन्द्रबाबु अधिकारीले जानकारी दिए ।

शल्यक्रियाका लागि ‘सिआईसिएस’ विधिमार्फत नि:शुल्क र ‘पीएचएसिओ’ उपकरणको प्रयोग गर्दा सहुलियत दरमा उपचारको व्यवस्था मिलाइएको रेडक्रसले जनाएको छ।

तालिका

मिति (२०८३ बैशाख)	स्थान	स्थानीय तह/वडा
३ गते, बिहीबार	बानियाटार स्वास्थ्य ईकाइ	पञ्चकन्या गा.पा.-१
४ गते, शुक्रबार	कालिका मा.वि.	सूर्यगढी गा.पा.-२, कटुञ्जे
६ गते, आइतबार	१ नम्बर वडा कार्यालय	तादी गा.पा.-१, डाङसिङ
७ गते, सोमबार	जोरचौतारा स्वास्थ्य चौकी	तादी गा.पा.-३, जोरचौतारा
८ गते, मंगलबार	किम्ताङ स्वास्थ्य चौकी	म्यागङ गा.पा.-४, किम्ताङ
९ गते, बुधबार	देउराली अस्पताल	म्यागङ गा.पा.-३, देउराली
१० गते, बिहीबार	बिन्दुकेशर मा.वि.	म्यागङ गा.पा.-५, टक्सार
११ गते, शुक्रबार	गणेश मा.वि.	सूर्यगढी गा.पा.-४, रातमाटे
१३ गते, आइतबार	लिखु ग्रामीण आँखा केन्द्र	लिखु गा.पा.-४, चौघडा
१४ गते, सोमबार	साल्मे स्वास्थ्य चौकी	किस्पाङ गा.पा.-४, साल्मे
१५ गते, मंगलबार	काहुले स्वास्थ्य चौकी	किस्पाङ गा.पा.-३, काहुले
१६ गते, मंगलबार	महादेव मा.वि.	बेलकोटगढी न.पा.-९, बाघखोर