२५ फागुन, नुवाकोट । नुवाकोट जिल्लालाई पूर्ण खोप सुनिश्चितता तथा दिगोपन जिल्ला घोषणा गरिएको छ । जिल्लालाई १६ महिनादेखि ५ वर्षमुनिका बालबालिकाहरुले पूर्ण खोप पाएको सुनिश्चितता तथा दिगोपन जिल्ला घोषणा गरिएको हो ।
खोपको माध्यमबाट रोगको रोकथाम, निवारण र उन्मुलन गरी शिशु, बाल, मातृ तथा अन्य व्यक्तिको मृत्युदर घटाउन र खोप सेवाको विस्तार र सुदृढीकरण गरी गुणस्तरीय खोप सेवा निरन्तरता रहेको भन्दै नुवाकोट पूर्ण खोप सुनिश्चतता तथा दिगोपन जिल्ला घोषणा भएको हो ।
आईतबार जनस्वास्थ्य कार्यालयद्वारा आयोजित एक कार्यक्रमका बीच बागमती प्रदेशका मुख्यमन्त्री बहादुरसिंह लामा तामाङले पूर्ण खोप सुनिश्चितता अभियानको सफलतासँगै नुवाकोट जिल्लालाई पूर्ण खोप सुनिश्चितता जिल्ला घोषणा गरिएको हो ।
कार्यक्रममा स्वास्थ्य मन्त्री किरण थापा मगर, नुवाकोट जिल्लाका स्थानीय तहका प्रमुख र उपप्रमुख, जिल्ला प्रशासन कार्यालय नुवाकोटका प्रमुख र महिला स्वयंमसेविका लगायतको उपस्थिति रहेको थियो ।
कार्यक्रममा मुख्यमन्त्री लामाले नुवाकोट जिल्लामा स्वास्थ्य क्षेत्रको समृद्धि र खोप अभियानको महत्त्वमाथि जोड दिएका थिए ।
१६ महिनादेखि १६ वर्षमुनिका बालबालिकाले बीसीजी, रोटा, पोलियो, एफआईपीभी, पीसीभी, डीपीटी, हेप–बी, दादुरा–रुवेला र जापनीज इन्सेफलाइटिस विरुद्धका विभिन्न चरणका खोप समय तालिकाभित्र प्राप्त गरेपछि पूर्ण खोप पाएको मानिन्छ ।
स्थानीय सरकार संचालन ऐन, ०७४ को परिच्छेद ३ मा गाउँपालिका/नगरपालिकाको काम, कर्तब्य र अधिकार तथा वडा समितिको काम, कर्तब्य र अधिकारभित्र आधारभूत स्वास्थ्य सेवा अर्न्तगत खोप सेवा संञ्चालनको ब्यवस्था गरेको छ ।
यस घोषणासँगै नुवाकोट जिल्ला भविष्यमा स्वास्थ्य सुधार र जनस्वास्थ्य प्रबर्द्धनको सम्भावनालाई सकारात्मक प्रभाव पार्ने अपेक्षा गरिएको छ ।
प्रतिक्रिया