नुवाकोट – अवैध रुपमा भन्सार छलि ल्याएको ६६ लाख ८९ हजार ८०० रूपैयाँ बराबरको मोबाइलहरू नुवाकोट प्रहरीले बरामद गरेको छ।

गल्छीबाट त्रिशुलीतर्फ आउँदै गरेको बा ३ ख ८६१२ नम्बरको हाईस गाडीलाई रोकी चेकजाँच गर्ने क्रममा सोही गाडीमा सवार जिल्ला कञ्चनपुर बेदकोट नगरपालिका वडा नं. १ का अन्दाजी ५९ वर्षीय डम्बरसिंह विष्टले झोलामा लुकाई छिपाई ल्याएको बिल बिनाको ८९ थान विभिन्न कम्पनीको मोबाईलहरू फेला परेको जिल्ला प्रहरी कार्यालय नुवाकोटका प्रहरी नायव उपरीक्षक तीलक भारतीले जानकारी दिए ।

बेलकोटगढी नगरपालिका वडा नं. ५ अस्थाई प्रहरी पोष्ट कोल्पुटार अगाडी गल्छी-त्रिशुली सडकखण्डमा प्रहरी अधिकृतसहितको टोलीले सवारीसाधन चेकजाँच गर्ने क्रममा उक्त सामान बरामद गरेको हो ।

बरामद गरिएका अवैध मालसामानसहित पक्राउ परेका सबैलाई आवश्यक कारबाहीका लागि भन्सार कार्यालय पठाउने तयारी भइरहेको प्रहरी नायव उपरीक्षक तीलक भारतीले बताए ।