नुवाकोट – यसवर्षको दसैंमा पनि नुवाकोटमा फुलपाती भित्र्याइएको छ ।
विदुर नगरपालिका-२ स्थित दरबार परिसरबाट अशोकबारीको धोबिधारा चौतारासम्म निजामती सेवाका उच्चपदस्थ अधिकारी, नेपाली सेनाको ब्याण्डबाजा, नुवाकोट भैरवी गुठीका बाजागाजसहितको लावालस्करका साथमा फूलपाती ल्याउने परम्परा छ ।
नेपाली सेनाको सलामीका साथ बस्नेत, मगर र अर्याल समुदायले संकलन गरेको फुलपाती विशेष कार्यक्रमका साथ भित्र्याइएको हो ।
नुवाकोटको फुलपाती भित्राउने परम्परा मल्लकालदेखि नै सञ्चालन भएको मानिन्छ । वि.स. १८०१ साल असोज १५ गते तेस्रो प्रयासमा पृथ्वीनारायण शाहले नुवाकोट विजय प्राप्त गरेपछि झनै महत्व बढेर गएको सरकारका प्रतिनिधि द्वारे महेन्द्र शाहिले बताए । फुलपाती भित्र्याउने परम्परा गोरखा र हनुमानढोकामा जति महत्वपूर्ण रहेको छ, नुवाकोटको पनि उत्तिकै महत्व रहेको उनले बताए ।
सरकारी प्रतिनिधि सहितका सर्वसाधारण पहिले साततले दरबार राष्ट्रिय संग्रहालयमा भेला भएर फुलपाती जात्रासहित भित्र्याएका हुन् ।
प्रसिद्ध तुलजामा फुलपाती भित्र्याउनु अघि फुलपाती ल्याउने स्थान र फुलपाती भित्र्याउने स्थानमा लिपपोत गरि चोखो बनाई विशेष पुजापाठ गरिएको थियो ।
प्रतिक्रिया