विदुर – तिलगंगा आँखा प्रतिष्ठान, जिल्ला सामुदायिक आँखा केन्द्र र नेपाल रेडक्रस सोसाइटी नुवाकोटको आयोजनामा २१३ जनाको मोतियाविन्दुको निःशुल्क शल्यक्रिया गरिएको छ ।
कार्तिक २३ गतेदेखि मङ्सिर ३ गतेसम्म भएको एकदिने मोतियाविन्दु छनौट शिविरबाट एक हजार ७५१ जना बिरामीको आँखा परीक्षण गरी २१३ जना बिरामी पहिचान गरि सफल मोतियाविन्दुको शल्यक्रिया गरिएको केन्द्रका प्रमुख ताराबहादुर वाईबाले जानकारी दिए । विदुर नगरपालिका, बेलकोटगढी नगरपालिका, ककनी गाउँपालिका, तारकेश्वर, सूर्यगढी, शिवपुरी, किस्पाङ, म्यागङ गाउँपालिकाको विभिन्न स्वास्थ्य चौकी र विद्यालयमा गरी बिरामी पहिचान गरिएको उनले बताए ।
तिलगंगा आँखा प्रतिष्ठानका वरिष्ठ नेत्ररोग विशेषज्ञहरुको टोलीले गरेको तीनदिने मोतियाविन्दु शल्यक्रिया शिविरको उद्घाटन प्रमुख जिल्ला अधिकारी सुरेन्द्र पौडेलले गरेका थिए ।
नेपाल रेडक्रस सोसाइटीको प्राङ्गणमा मङ्सिर ४ गतेदेखि ६ गतेसम्म तीन दिनसम्म भएको शल्यक्रिया शिविरबाट २१३ बिरामीको आँखाको ज्योति फर्काइएको नेपाल रेडक्रस सोसाइटी नुवाकोटका सभापति हरि श्रेष्ठले जानकारी दिए ।
आँखाको शल्यक्रिया गरिएका बिरामीहरुलाई नि:शुल्क औषधी वितरण गर्नुको साथै शल्यक्रिया गरिएको आँखाको स्वास्थ्य सुरक्षाबारे सचेतना दिईएको थियो ।
शिविरमा द फ्रेड हलोस फाउन्डेसन गैरसरकारीको सहयोग रहेको थियो ।
प्रतिक्रिया