विदुर – नुवाकोटको ककनी गाउँपालिका-३ चाउथेका एक ३९ वर्षिय पुरुषमा आईतबार कोरोना संक्रमण देखिएको छ । स्वास्थ्य तथा जनसंख्या मन्त्रालयले नियमित पत्रकार सम्मेलनमा मन्त्रालयमा प्रवक्ता डा. विकास देवकोटाले उक्त जानकारी दिएका हुन् ।
काठमाडाैँ महानगरपालिकाको समन्वयमा भएको कोरोना परीक्षणमा ती पुरूषमा कोरोना संक्रमण पुष्टि भएको हो । यो सँगै नुवाकोटमा पहिलो कोरोनाभाइरस संक्रमण पुष्टि भएको छ ।
महानगरपालिकाले गत जेष्ठ ६ गते ओखरपौवा सिसडोल ल्याण्डफिल्ड साईड क्षेत्रका १ सय ५२ जनाको स्वाब संकलन गरि पिसिआर परीक्षणका लागि केन्द्रीय जनस्वास्थ्य प्रयोगशाला टेकु पठाएकोमा आज आईतबार संक्रमण पुष्टि भएको हो ।
कोरोना संक्रमण पुष्टि भएपछि ती पुरूषलाई उपचारको लागि काठमाडौँ लैजाने क्रममा रहेको छ ।
जिल्लाभरबाट अहिलेसम्म पिसिआर परिक्षण २ सय ३७ जनामा गरिएकोमा ६४ जनामा नेगेटिभ देखिएको थियो । १ सय ७२ जनाको रिपोर्ट अझै नआईसकेको जिल्ला स्वास्थ्य कार्यालयका सूचना अधिकारी उत्तम खनालले जानकारी दिएका छन्। आरडीटी परिक्षणमा १५ सय ५५ जनाको परिक्षण गरिएकोमा ३३ जनामा पोजेटिभ देखिएको छ भने १५ सय २२ जनामा निगेटिभ रहेको थियो।
आइतबार जिल्लाभरमा दुई जनाको पिसिआर परिक्षण गरिएको छ भने नमुना स्वाब सङ्कलन गरी केन्द्रीय जनस्वास्थ्य प्रयोगशाला पठाईएको छ । यस्तै, १५ जनाको आरडीटी परिक्षण गरिएकोमा सबैको निगेटिभ देखिएको खनालले जानकारी दिए।
प्रतिक्रिया