कुमरी, नुवाकोट/बेलकोगटगढी नपा–२ कुमरीस्थित जनजागरण पुस्तकालय स्रोत केन्द्रले सुविधा सम्पन्न भवन निर्माण गरी सञ्चालनमा ल्याइएको छ ।
भूकम्पले क्षतिग्रस्त भएपछि सो पुस्तकालय टहरामा सञ्चालन हुँदै आएको थियो ।
नेपाली काँग्रेसका नेता प्रकाशमान सिंह र पुस्तकालय भवन निर्माणमा सहयोग गर्ने संस्था एसएसबीका अध्यक्ष मार्टिन कुशटम्यानले संयुक्त रुपमा आज नवनिर्मित सो पुस्तकालय भवनको उद्घाटन गर्नुभयो ।
सो अवसरमा नेता सिंहले पुस्तकालयले प्रदान गर्ने सेवा र यहाँको पुस्तकलाई धेरै उपयोग गर्नुपर्ने बताउँदै गाउँमा पनि यति धेरै सुविधा सम्पन्न पुस्तकालय निर्माण हुनु ज्यादै प्रंशसनीय कार्य भएकाले यसको सक्दो उपयोग गर्नु होला भन्नसभयो ।
एसएसबीका अध्यक्ष मार्टिनले पुस्तकालयप्रति यहाँको समुदायको लगाव देखेर नै सहयोग जुटाएर भवन निर्माणमा सघाएको बताउनुभयो ।
नेपाली काँग्रेसका जिल्ला सभापति तथा पूर्वसभासद् जगदीश्वरनरसिंह केसीले समुदायको अगुवाइमा स्थापना भएको सो सुविधा सम्पन्न पुस्तकालयले यो क्षेत्रमा थप सकारात्मक ऊर्जा थप्ने विश्वास व्यक्त गर्नुभयो ।
रिड नेपालका अध्यक्ष भोलाकुमार श्रेष्ठ, बेलकोगटगढी नपा–२ का वडाअध्यक्ष रमेश न्यौपानेलगायतले नुवाकोटले गर्व गर्न लायक पुस्तकालय निर्माण भएको बताउनुभयो ।
विसं २०६४ मा स्थापना भएको जनजागरण सामुदायिक पुस्तकालय भवन विसं २०७२ वैशाख १२ गते गएको भूकम्पले भत्काएपछि टहरामा सञ्चालन हुँदै आएको थियो ।
रिड नेपाल र एएसबीको आर्थिक तथा प्रविधिक सहयोगमा ‘जनजागरण सामुदायिक पुस्तकालयको पुनःनिर्माण तथा समुदायमा आधारित समाबेशी विपद् जोखिम न्यूनीकरण परियोजना’ अन्तर्गत भवन निर्माण गरिएको पुस्तकालयका अध्यक्ष रामचन्द्र तिमल्सिनाले जानकारी दिनुभयो ।
नवनिर्मित भवनमा पुस्तकालय कक्ष, बाल कक्ष, महिला कक्ष, युवा कक्ष, सभाहल, सूचना सञ्चार प्रविधि कक्ष, विपद् जोखिम न्यूनीकरण कक्ष, श्रव्य दृश्य कक्षलगायत रहेको अध्यक्ष तिमिल्सेनाले जानकारी दिनुभयो ।
रु दुई करोड ७५ लाख २७ हजार ५० को लागतमा सो पुस्तकालय निर्माण भएको जनाएको छ । (रासस)
प्रतिक्रिया