२०८०, १६ चैत्र शुक्रबार

एकल बहुमतका लागि तयार हौँ -रामप्रसाद पुडासैनी

    कार्तिक १७ २०७४ ११:५३

pratik book and stationery center in nuwakot
social securities awareness bidur municipality
bagamati province sanchar registrar office

अहिले नेपालीलाई चाहिएको स्वतन्त्रता सहितको विकास हो । नेपालीको स्वतन्त्रता कुनै पनि वाद वा विचारले बहुमत वा दुईतिहाइ ल्याउँदैमा हराउन सक्ने अवस्था छैन । जब हाम्रो स्वतन्त्रता हरण हुँदैन भने जुन मोर्चाले बहुमत ल्याए पनि त्यसलाई ल्याउन दिनुपर्छ । बहुमत ल्याएपछि कम्तीमा पाँच वर्ष त राजनीतिक स्थायित्व हुन्छ । बहुमत ल्याएपछि पनि बीचमै सत्ता चलाउन सकेन भने चलाउन नसक्नेहरू पाखा लाग्छन् । वाद र विचारसँग डराउनेभन्दा पनि एउटा दल वा मोर्चालाई बहुमत दिलाउने प्रयासमा सबैले साथ दिनुपर्छ । नेपालले विकासमा गति नै लिन नसक्नुका धेरै कारणमध्ये कुनै पनि दलको बहुमत नहुनु एक कारण हो । काङ्ग्रेस, एमाले, माओवादी वा अन्य दलको विचारभन्दा पनि बहुमत ल्याउने पक्का भएको शक्तिलाई मत दिएर एकल बहुमतका लागि पहल गरौँ । यहाँ एमाले नेतृत्वको मोर्चा र काङ्ग्रेस नेतृत्वको मोर्चाले बहुमत वा दुईतिहाइ ल्याउना साथ तानाशाही हुन्छ भन्नु अहिलेको खुला परिवेशलाई भुल्नु हो ।

प्रतिनिधिसभा र प्रदेश सभा निर्वाचनले राजनीति तातेको छ । पहिलो चरणमा मङ्सिर १० र दोस्रो चरणमा मङ्सिर २१ गते निर्वाचन कार्यतालिकाअनुसार पहिलो चरणको निर्वाचनका लागि दल र उम्मेदवारहरूले चिह्नसमेत पाइसकेका छन् । दोस्रो चरणका लागि भने आज १६ गते उम्मेदवारी दिनेछन् । निर्वाचन आयोग र राजनीतिक दल मात्र होइन, जनतासमेत निर्वाचनका लागि तयारी अवस्थामा छन् ।

निर्वाचनका लागि दलहरूले मोर्चा बनाएका छन् । नेकपा एमालेको नेतृत्वमा वामपन्थी र नेपाली काङ्ग्रेसको नेतृत्वमा लोकतान्त्रिक मोर्चा बनेको छ । मोर्चाको पक्ष र विपक्षमा अहिले राजनीतिक दलहरूबीच वाक्युद्ध नै चलेको छ । धेरै दल भएको कारण राजनीतिक अस्थिरता भयो भन्नेमा दलहरू आफैँ सहमत छन् । तर, मोर्चा बनाएर निर्वाचनमा गएकोमा पनि आलोचना भएको छ । एमाले नेतृत्वको वाम गठबन्धनप्रति अहिले धेरै आलोचना भएको छ । एमाले भनेको स्थानीय तहको निर्वाचनमा पहिलो बनेको दल हो । माओवादी तेस्रो । पहिलो र तेस्रो दल मिलेपछि अरू सबै दलहरूको अवस्था कमजोर हुन्छ भनेर आलोचना भइरहेको छ ।

एमालेको नेतृत्वमा वाम गठबन्धन बनेपछि काङ्ग्रेसले आफूबाट बाहिरिएका विजयकुमार गच्छदारलगायतका विभिन्न समूहलाई पुनः आफ्नो पार्टीमा प्रवेश गराइसकेको छ । काङ्ग्रेसले राप्रपालाई पनि गठबन्धनमा तानेको छ भने तराईका दलहरूलाई पनि पार्टीगत वा व्यक्तिगत रूपमा ल्याउने प्रयास जारी राखेको छ । काङ्ग्रेस छाडेर बाहिरिएर मधेसवादी दलहरूमा प्रवेश गरेका केही नेताहरू पनि पुनः काङ्ग्रेसमै फर्किएका छन् । एमाले नेतृत्वको मोर्चा र काङ्ग्रेस नेतृत्वको मोर्चा बलियो बन्दै गएको कारण निर्वाचनमा एउटा मोर्चाले बहुमत ल्याउने देखिन्छ । एकल बहुमत नभएको कारण राजनीतिक अस्थिरता बढेको दलहरू नै स्वीकार गर्छन् अनि फेरि मोर्चा बनेकामा कडा विरोध पनि गर्छन् । यसले दलहरू निहित स्वार्थबाट प्रेरित छन् भन्ने देखिन्छ । आफ्नो मोर्चा बलियो भएमा मोर्चा चाहिन्छ भन्ने अनि आफ्नो नेतृत्वको मोर्चा कमजोर भयो भने मोर्चाविरुद्ध विषवमन गर्ने काम भएको छ । दलहरूले दोहोरो चरित्र त्याग्नुपर्छ । बहुमत ल्याएर एउटा दल वा मोर्चालाई काम गर्न दिने वा कसैलाई पनि बहुमत ल्याउन नदिएर सधैँ राजनीतिको फोहोरी खेल खेलिरहन दिने ? यसबारेमा दलहरूले प्रस्ट भन्नुपर्छ । आफूले बहुहत ल्याएमा ठीक र अरूले ल्याएमा बेठीक भन्ने सोच त्याग्नुपर्छ ।

देशलाई राजनीतिक रूपमा स्थिर र आर्थिक रूपमा एउटा बाटोमा लगाउने हो भने बहुमत ल्याउने मोर्चा बनाउने कार्यलाई दलहरूले स्वीकार गर्नुपर्छ । खासगरी नेपाली काङ्ग्रेस वाम गठबन्धनबाट धेरै त्रसित छ । तर, वाम गठबन्धनले निर्वाचन जितिहाल्छ र काङ्ग्रेस पत्तासाफ हुन्छ भन्ने के ग्यारेन्टी छ ? निर्वाचनमा जनता लाइन लागेर मतदान गरेपछि त्यसको गणना नगरी छिनोफानो हुन सक्तैन । जनताले मत नै दिन्छन् भने किन गाली गर्ने ? कुनै एउटा दल वा मोर्चालाई पाँच वर्ष काम गर्न दिएमा उसले राम्रो काम ग¥यो भने दश वर्ष वा थप केही वर्ष सरकार चलाउला । यदि देश नै बन्छ भने किन डराउनु ? देशलाई समृद्ध बन्न नदिने हो भने मोर्चा बनाएको विषयलाई लिएर आलोचना गर्दै जाऊँ होइन देश समृद्धिको बाटोमा हिँड्छ भने मोर्चा बनाएर निर्वाचनमा जाने सुरुवातको किन विरोध गर्ने ? नेपालका राजनीतिक दलहरू कुनै बेला कुकुर–बिरालो भएका थिए । बाध्यताले दलहरू अहिले मिल्ने अवस्थामा आएका छन् । दलहरू मिल्दा जनता र देशलाई नै हित हुन्छ भने कुनै वाद वा विचारलाई विरोध गर्नुको कुनै औचित्य छैन । नेपाल आर्थिक रूपमा धेरै कमजोर अवस्थामा पुगेको छ । कुनै वाद वा विचारले नेतृत्व गर्दा राम्रो हुन्छ भने हार्ने विचार वा वादले आफूलाई जनताको चाहनाअनुसार ढाल्नुपर्छ । यदि जनताको चाहनाअनुसार ढाल्न सकेमा अर्को निर्वाचन जित्नेमा कुनै शङ्का छन् ।

विश्वमै शक्तिशाली देशको रूपमा देखिएको अमेरिकामा पनि ४ वा ८ वर्ष एउटा विचारले शासन गर्छ अनि फेरि अर्को विचारले अर्को ४ वा ८ वर्ष शासन गर्छ । नेपालमा पनि त्यही अवस्था ल्याउन सकिएमा देशमा विकासले फड्को मार्नेमा कुनै शङ्का छैन । अहिले नेपालीलाई चाहिएको स्वतन्त्रतासहितको विकास हो । नेपालीको स्वतन्त्रता कुनै पनि वाद वा विचारले बहुमत वा दुईतिहाइ ल्याउँदैमा हराउन सक्ने अवस्था छैन । जब हाम्रो स्वतन्त्रता हरण हुँदैन भने जुन मोर्चाले बहुमत ल्याए पनि त्यसलाई ल्याउन दिनुपर्छ । बहुमत ल्याएपछि कम्तीमा पाँच वर्ष त राजनीतिक स्थायित्व हुन्छ । बहुमत ल्याएपछि पनि बीचमै सत्ता चलाउन सकेन भने चलाउन नसक्नेहरू पाखा लाग्छन् । वाद र विचारसँग डराउनेभन्दा पनि एउटा दल वा मोर्चालाई बहुमत दिलाउने प्रयासमा सबैले साथ दिनुपर्छ । नेपालले विकासमा गति नै लिन नसक्नुका धेरै कारणमध्ये कुनै पनि दलको बहुमत नहुनु एक कारण हो । काङ्ग्रेस, एमाले, माओवादी वा अन्य दलको विचारभन्दा पनि बहुमत ल्याउने पक्का भएको शक्तिलाई मत दिएर एकल बहुमतका लागि पहल गरौँ । यहाँ एमाले नेतृत्वको मोर्चा र काङ्ग्रेस नेतृत्वको मोर्चाले बहुमत वा दुईतिहाइ ल्याउनासाथ तानाशाही हुन्छ भन्नु अहिलेको खुला परिवेशलाई भुल्नु हो । नेपाली जनताले पनि जुन मोर्चाले एकल बहुमत ल्याउँछ त्यसैलाई मतदान गरौँ । राजनीतिक फोहोरी खेलबाट हामी नेपाली धेरै आजित भइसकेका छौँ । अब पनि यस्तै फोहोरी खेल हेर्ने पक्षमा हामी छैनौँ । त्यो मोर्चा काङ्ग्रेस नेतृत्वको होस् वा एमाले नेतृत्वको होस् जसले पाँच वर्षसम्म सत्ता चलाउँछ त्यसैलाई दिएर हेरौँ । काम गरेनन् भने काम नगर्ने दल वा मोर्चा आफैँ पाँच वर्षपछि खुइलिएर जानेछन् ।

प्रतिक्रिया


nuwakot trishuli graphic web media service 2020

Top