पाठकको स्मृतमा संगीत अक्षय कोष

विदुर – कर्तव्य पालनाको शिलशिलामा सडक दुर्घटनामा परि निधन भएका सशस्त्र प्रहरी निरीक्षक दुर्गाबाबु पाठकको स्मृतिमा संगीत अक्षय कोषको स्थापना गरिएको छ । गायक, रचनाकार तथा संगीतकार समेत रहेका पाठकको स्मृतिमा सशस्त्र प्रहरी निरीक्षक स्व. दुर्गाबाबु पाठक स्मृति अक्षय कोषको स्थापना गरिएको हो ।

सशस्त्र प्रहरी निरीक्षक स्व. पाठकको कर्तव्य पालनको शिलशिलामा गत चैत्र २८ गते धादिङको मलेखुमा मोटरसाइकल दुर्घटनामा परि निधन भएको हो । स्वर्गिय पाठकका एकै व्याचका सशस्त्र प्रहरी निरीक्षकहरुले सामुहिक रुपमा रकम संकलन गरि डेढ लाख रुपैयाँको अक्षयकोष स्थापना गरिएको सोही व्याचका सशस्त्र प्रहरी निरीक्षक शैलेन्द्र थापाले जानकारी दिए । सो संगीत कोषमा रहेको रकमबाट प्राप्त हुने वार्षिक ब्याजबाट प्रत्येक वर्ष सशस्त्र प्रहरी बलको नेपाल एपीएफ स्कूलमा संगीततर्फ प्रथम हुने एक जना छात्र–छात्रालाई सो पुरस्कार प्रदान गरिने छ । साथै यो कोषको सम्पूर्ण रेखदेख सशस्त्र प्रहरी परिवार महिला संघले गर्ने र संघको वार्षिकोत्सवमा सो पुरस्कार प्रदान गरिने छ । २०६४ सालमा खुल्ला प्रतिस्पर्धाबाट सशस्त्र प्रहरी निरीक्षक पदबाट सेवा प्रवेश गरेका स्व. पाठकका ‘पन्छी’ र ‘निन्द्रा लाग्दैन’ गरी २ वटा एल्बम बजारमा आइसकेका थिए ।

जसमा हजुरको देशमा, पलपल तिम्रै यादले, निन्द्रा लाग्दैन बोलका गितहरु यूट्युबमा समेत चर्चित छन् । जसमा उनले चर्चित गायिका अन्जु पन्तसँग संयुक्त स्वर दिएका छन् भने म्यूजिक भिडियोमा चर्चित नायिका केकी अधिकारी र निता ढुंगानाले अभिनय गरेका छन् ।

यस प्रकारको कार्यले संगीत, गायन, बाद्यवादन, गीत रचना आदि सांगीतिक क्षेत्रमा योगदान पुग्ने अपेक्षा गरिएको छ । यस अक्षय कोषको स्थापनाले उनको सांगीतिक यात्रालाई स्थायीत्व र स्मरणीय बनाउने सशस्त्र प्रहरी निरीक्षक थापाले बताए ।