२२ फागुन, विदुर । बागमती प्रदेशकै नुवाकोट जिल्ला किशोरीलाई पाठेघरको मुखमा लाग्ने क्यान्सरविरुद्वको (एचपिभि) शतप्रतिशत खोप लगाउन सफल भएको छ ।

जिल्लाका ११ हजार १५९ जना किशोरीलाई पाठेघरको मुखमा लाग्ने क्यान्सरविरुद्वको खोप लगाइएको जिल्ला जनस्वास्थ्य कार्यालय नुवाकोटले जनाएको छ । अभियानमा ११ हजार १७८ जना किशोरीलाई खोप लगाउने लक्ष्य राखिएको थियो ।

जिल्लाको दुई नगर र १० गाउँपालिका गरी १२ वटा स्थानीय तहका कक्षा ७ देखि १० सम्मका र विद्यालय नजाने ११ वर्षदेखि १४ वर्ष उमेर समूहका किशोरीलाई अभियान अन्तर्गत उक्त सङ्ख्यामा एचपिभि खोप लगाईएको कार्यालयका प्रमुख महेन्द्रध्वज अधिकारीले जानकारी दिए । अभियानको क्रममा विवाह भइ गएका र स्थान्तरण भई गएका केहीले खोप लगाउन छुटेतापनि लक्षितभन्दा बढी खोप लगाउन सफल भएको उनले बताए ।

विदुरमा एचपिभी खोप ९९.९ प्रतिशत लक्ष्य हासिल

जिल्लाभित्रका विद्यालयमा अध्ययन गर्ने ८ हजार ७ सय २६ र विद्यालय नजाने १३४ गरी ८ हजार ८६० किशोरीलाई एचपिभि खोप लगाइएको खोप अधिकृत अमृत महर्जनले जानकारी दिए । यसैगरी नियमति एचपिभि खोपअन्तर्गत कक्षा ६ का छात्राहरु २ हजार २८१ जना र विद्यालय नजाने १० वर्ष उमेरका १८ जना गरी कुल २ हजार २९९ जना किशोरीहरु खोप लगाईएको उनले जानकारी दिए ।

तथ्यांकअनुसार विदुरमा १०१. २९ प्रतिशत, दुप्चेश्वरमा १००.३५ प्रतिशत, बेलकोटगढीमा ९८.५८ प्रतिशत, म्यागङमा १०० प्रतिशत, किस्पाङमा १००.८० प्रतिशत, तारकेश्वरमा ९८.४६ प्रतिशत किशोरीहरूले खोप लगाएका छन् । यसैगरी शिवपुरीमा ९४.४१ प्रतिशत, पन्चकन्यामा १०३.०८ प्रतिशत, लिखुमा १००.३७ प्रतिशत, तादीमा ११६.९७ प्रतिशत, सुर्यगढीमा ९८.५९ प्रतिशत र ककनीमा १०६.१९ प्रतिशत किशोरीहरूले खोप लगाएका छन् ।

दुप्चेश्वरका एक हजार ९८ जनाले लगाए एचपिभी खोप

फागुन ६ गतेको प्रारम्भिक नतिजाअनुसार नुवाकोट जिल्लाले प्रदेशभरिकै उत्कृष्ट नतिजा हासिल गरेको उनले बताए । नुवाकोटले शतप्रतिशत खोप लगाएको छ । अन्य जिल्लाहरूमा दोलखामा ९९ प्रतिशत, रामेछापमा ९८ प्रतिशत, सिन्धुपाल्चोकमा ९७ प्रतिशत, रसुवामा र सिन्धुलीमा ९६ प्रतिशत, मकवानपुमा ८७ प्रतिशत र काभ्रेपाल्चोकमा ८६ प्रतिशत किशोरीहरूले खोप लगाएका छन् । यसैगरी चितवनमा ८३ प्रतिशत, भक्तपुरमा ८२ प्रतिशत, धादिङमा ७७ प्रतिशत, काठमाडौँमा ७२ प्रतिशत र ललितपुरमा ७० प्रतिशत किशोरीहरूले खोप लगाएका छन् । बागमती प्रदेशमा ८० प्रतिशत खोप लगाउँदा कोशी प्रदेशले सबैभन्दा बढी १०१ प्रतिशत किशोरीहरूले खोप लगाएका छन् ।

खोप अभियान माघ २२ देखि फागुन ६ गतेसम्म चलाइएको थियो । यो खोप लगाएपछि १५ वर्षसम्म पाठेघरको मुखमा लाग्ने क्यान्सरको जोखिम नहुने स्वास्थ्य मन्त्रालयले जनाएको छ ।

नेपाल सरकारले देशव्यापी रुपमा पाठेघरको मुखमा लाग्ने क्यान्सर रोग न्यूनीकरणका लागि अभियान चलाउने घोषणा गरेसँगै नुवाकोट जिल्लाले किशोरीहरुलाई यो खोप दिएको हो । खोप विद्यालय र तोकिएका केन्द्रमा लगााइएको बताइएको छ । स्वास्थ्यकर्मी ३०४ जना र महिला स्वास्थ्य स्वयंसेविका ५३६ जना खटाईएको थियो ।