विनासकारी भुकम्पका बेला ठूलो मानवीय क्षति व्यहोरेको रसुवाको लाङटाङ १५ महिनापछि खतरामुक्त भएको छ ।

हिमपहिरोले मावन बस्ती नै पुरिएर मरुभूमिझैँ बनेको लाङटाङ क्षेत्रको पर्यटकीय पदमार्ग मर्मत र पुनःनिर्माणपछि आवतजावतमा सहजता भएको छ भने यहाँका बासिन्दाहरु विस्तारै पूरानै लयमा फर्कँदै छन् ।

लाङटाङमा आन्तरिक तथा वाह्य पर्यटकसमेत जान थालेको रसुवाका प्रमुख जिल्ला अधिकारी कृष्णप्रसाद अधिकारीले वताए । भुकम्पका बेला लाङटाङका दुई सय जनालाई स्थानान्तरण गरी सदरमुकाम धुन्चे र काठमाडौको स्वयम्भु लगिएकोमा हाल आधा भन्दा धेरै विस्थापित लाङटाङमै फर्किएको जिल्ला प्रशासन कार्यालय रसुवाले जनाएको छ ।

अब पैदल हिँड्न समस्या हुँदैन, मानविय र प्राकृतिक खतरा पनि छैन ।

मौसम सफा रहेका वेला हेलिकप्टरमार्फत निर्माण सामग्री स्थानीयवासीले ओसारेर घर निर्माणका साथै अन्य सामान ओसार्ने काम गरिरहेको प्रशासनले जनाएको छ । स्थानीय र विदेशी तथा स्वदेशी पर्यटकहरु गरी पाँचसय भन्दा बढी नागरिककको मृत्यु भएको घटनापछि उजाड बनेको यो बस्तीबाट थातथलो छोडेर हिँडेका बाँचेका बाँकी स्थानियहरु पनि अहिले गाउँ फर्किसकेका छन् ।

लाङटाङमा अचेल दैनिक १० जना विदेशी पर्यटक दैनिक रुप गइरहेका छन् । स्वर्ग झैं प्राकृतिक सुन्दरताको खानी लाङटाङलाई पहिलेजस्तै ब्युँताउने अठोटका साथ दैनिकी सहज बनाउने प्रयासमा स्थानीयहरु जुटिरहेका छन् ।

जिल्ला प्राविधिक कार्यालय रसुवाका अनुसार लाङटाङ पदमार्ग मर्मत÷निर्माणपछि स्याफ्रुबेंसी–खामजिङ–सेर्पागाउँ–रिम्चे हुँदै लाङटाङ क्याङ्जेनसम्म यात्रा गर्न सहज वातावरण भइसकेको छ ।

पैदल मार्गको स्थलगत निरीक्षणपछि नेपालको तेस्रो पर्यटकीय गन्तव्य भूकम्पले क्षति पुर्याउँदा तत्कालीन अवस्थामा मानवीय उद्धार कार्यक्रम अन्तर्गत पहिले १ सय १६ घर परिवारका ४ सय ९६ जनालाई हेलिकोप्टरबाट धुन्चेसम्म ल्याउने लैजाने व्यवस्था गरिएको प्रजिअ अधिकारीले वताए । हाल जिविस रसुवा मार्फत लाङटाङ खोलाको असहज गहिरो खोंचको बाटालाई छाडी सुरक्षित क्षेत्रको उक्त स्थानको पैदल मार्ग मर्मत निर्माण गरी स्थानीयवासी र पर्यटकको ओहरदोहरमा सहज बनाइएको छ । ‘भूकम्पसँगै आएको पहिराले पुरेको लाङटाङ गाउँ हेर्न आतुर रहेका सयौँ पर्यटक बाटामा ओहोरदोहर गरिरहेको अवस्थामा भेट्यौँ’, रसुवाका प्रहरी प्रमुख अवदेश विष्टले भने, ‘अब पैदल हिँड्न समस्या हुँदैन, मानविय र प्राकृतिक खतरा पनि छैन ।’

भूकम्पपछि पर्यटकलाई लाङटाङ जान सरकारले अनुमति नदिए पनि आफ्नै हिसाबले मात्र पर्यटक जाने गरेको बताइएको छ । यस्तै भदौ महिनामा आफ्नो थातथलो फर्केका लाङटाङवासीलाई केही गैससको सहयोगमा हेलिकोप्टरले जस्तापाता लगायतका सामग्री ढुवानीमा निरन्तरता दिइरहेको स्थानीय बासिन्दाले बताए ।

हिम पहिरोले बेपत्ता भएका एकसय ५ मध्ये लाङटाङ क्षेत्रमा केही महिना अघिसम्म २३ वटा मानव कंकाल पहिरोबाट फेला पारिएको थियो । रसुवामा भूकम्पपछि आएको हिम पहिरो र सुख्खा पहिरोबाट १ सय ३४ जना हराइरहेकोमा त्यस मध्ये १ सय ५ जना लाङटाङ क्षेत्रमा मात्र वेपत्ता थिए । जिल्ला प्रहरी कार्यालय रसुवाले जनाए अनुसार अझैँ स्वदेशी र विदेशी पर्यटक गरी ८२ जनाको शव भेटिन बाँकी छ ।

स्थानीयवासीले लाङटाङ पुर्ननिर्माण समिति नै गठन गरेर पहिरोले पुरिएका घर पुर्ननिर्माण गरिरहेको स्थानीय युवा दावा तामाङले वताए । लाङटाङ सदरमुकाम धुन्चेदेखि दुई दिनको पैदलमा रहेको कारण निर्माण सामग्री बोकाएर लैजान समस्या भएको उनको दुःखेसो रहेको छ ।