१० माघ, नुवाकोट । दशौँ झिल्टुङ क्रसकन्ट्री दौड प्रतियोगितामा देशभरका ३८ जिल्लाबाट तीन सयभन्दा बढी खेलाडीहरुले सहभागिता जनाएका छन् ।
बेलकोटगढी नगरपालिकाको गौरवको रुपमा स्थापित दौड प्रतियोगितामा राष्ट्रिय खेलाडी, भेट्रान धावक, खुला छात्र–छात्रा, आमा समूह, बा समूह गरी विभिन्न १० विधामा प्रतिस्पर्धा भएको ५ नम्बर वडा अध्यक्ष मदन भुजेलले जानकारी दिए ।
प्रतियोगितामा खुलातर्फ १३.४ किलोमिटर दूरीको पुरुषतर्फ अर्जुन, रमेश लिम्बू द्वितीय र रुकुमका ठकेन्द्र शर्मा तृतीय भएको दौडका परिकल्पनाकार मोहन नेपालले जानकारी दिए । महिलातर्फ फुलमति राना प्रथम, राज्यलक्ष्मी रावल द्वितीय र सुशीला महत तृतीय भएको जानकारी दिए ।
स्थानीय जुनियर यू–१६ छात्रतर्फ ४.५ किलोमिटरमा आशिष तामाङ प्रथम, गुलसन रोकामगर द्वितीय र मनिष तामाङ तृतीय भएका थिए । सोही दुरीमा छात्रातर्फ सिलसिला कुँवर प्रथम, सकिना तामाङ द्वितीय र राइस्का सुवेदी तृतीय भएका थिए ।
यसैगरी स्थानीय भेट्रान ४५ वर्षमाथि ४.५ किलोमिटरमा चन्द्रमान श्रेष्ठ प्रथम, मिठु नेपाल द्वितीय र राजेन्द्रप्रसाद नेपाल तृतीय भएका थिए ।
आमा समूहतर्फ ४.५ किलोमिटरमा सनिता श्रेष्ठ प्रथम, विमला श्रेष्ठ द्वितीय र भवानी लामिछाने तृतीय भएका थिए । भेट्रान खुला पुरुषतर्फ १३.४ किलोमिटरमा धर्म महर्जन प्रथम, रेवतबहादुर दाहाल द्वितीय र रामचन्द्र श्रेष्ठ तृतीय भएका थिए ।
स्थानीय खेल प्रतिभाको पहिचान, खेलकुद संस्कृतिको विकास तथा नगरलाई खेल पर्यटनको केन्द्रका रूपमा प्रवर्द्धन गर्नु प्रतियोगिताको उद्देश्य रहेको नगरप्रमुख जगतबहादुर गुरुङले बताए । नगरपालिकाले आगामी वर्षहरूमा प्रतियोगितालाई अझ व्यवस्थित, प्रतिस्पर्धात्मक र राष्ट्रियस्तरमा स्थापित गर्ने लक्ष्य लिएको नगरप्रमुख गुरुङले बताए।
उनले खेलकुदले अनुशासन, स्वास्थ्य र सामाजिक एकता प्रवर्द्धन गर्ने उल्लेख गर्दै झिल्टुङ क्रसकन्ट्री दौडलाई दीर्घकालीन पहिचान दिलाइने प्रतिबद्धता व्यक्त गरे।
प्रतियोगितामा एथलेटिक्स परिवार नेपालको प्राविधिक सहयोग रहेको थियो ।
प्रतिक्रिया