२१ वैशाख, नुवाकोट । पञ्चकन्या गाउँपालिकाले आयोजना गरेको नुवाकोट जिल्ला अन्तरपालिकास्तरीय चौथो चेयरम्यान कप पुरुष भलिबल प्रतियोगिताको उपाधि दाबेदार दुप्चेश्वर गाउँपालिकाले जितेको छ ।
शुक्रबार सम्पन्न फाइनल खेलमा दुप्चेश्वर गाउँपालिकाले आयोजक पञ्चकन्या गाउँपालिका ‘ए’ टोलीलाई ३–१ को सेटमा पराजित गर्दै उपाधि हात पारेको हो ।
प्रतिस्पर्धात्मक बनेको खेलमा दुप्चेश्वरले उत्कृष्ट प्रदर्शन गर्दै पञ्चकन्यालाई पराजित गर्न सफल भयो ।
प्रतियोगितामा तेस्रो स्थान तादी गाउँपालिकाले हात पार्दा चौथो स्थानमा पञ्चकन्या गाउँपालिका ‘बी’ टोली भएको छ ।
प्रतियोगिताभर उत्कृष्ट प्रदर्शन गरेका दुप्चेश्वर गाउँपालिकाका राजिव कँडेल सर्वोत्कृष्ट खेलाडी घोषित भएको पञ्चकन्या गाउँपालिकाका अध्यक्ष तेजबहादुर तामाङले जानकारी दिए ।
प्रतियोगिताको समापन समारोहमा बागमती प्रदेशसभा सदस्य रमेशकुमार महतको प्रमुख आतिथ्यता रहेको थियो ।
प्रतिक्रिया