२३ माघ, नुवाकोट । त्रिशूली अस्पतालमा बिरामीले आफ्नो रिपोर्ट आफैँ प्रिन्ट गरी लिन सक्ने व्यवस्था गरिएको छ ।

बिरामीले प्रयोगशालाको बिलमा भएको बारकोड मेसिनमा राखेर रिपोर्ट हेर्न र प्रिन्ट गर्न सकिने भएको छ ।

अस्पतालका निमित्त अस्पताल निर्देशक डा. राजेन्द्र लामाकाअनुसार यस सुविधाले प्रयोगशाला रिपोर्ट लिने ठाउँमा बिरामीको चाप घट्ने र बिरामीको समयको बचत हुने विश्वास लिइएको छ ।

‘बारकोड नम्बर’ राखी रिपोर्ट प्रिन्ट गर्न मिल्ने मेसिनबाट बिरामीले प्रयोग गर्न सक्ने अस्पताल व्यवस्थापना तथा संचालन समितिका अध्यक्ष उपेन्द्र बुढाथोकीले बताए ।

अस्पतालमा सामाजिक इकाई सेवाबाट प्राप्त गरेका बिरामीको पूर्ण विवरण र दैनिकरुपमा सेवाग्राहीको तथ्यांक डिजिटल बोर्डमा हेर्न सकिने व्यवस्था गरिएको उनले जानकारी दिए ।