पिपलटारमा खेलकुद महोत्सव हुदैँ

५ माघ, नुवाकोट । पिपलटार फुटबल क्लबको आयोजनामा यहि माघ २७ गतेदेखि फागुन ७ गतेसम्म प्रथम विदुर खेलकुद तथा पर्यटन महोत्सव हुने भएको छ ।

विदुर नपा-५ का वडा अध्यक्ष लिलानाथ न्यौपानेको संयोजकत्वमा एकसय ५० सदस्यीय मूल आयोजक समिति तथा विभिन्न उपसमिति गठन भएको छ ।

विदुर नगरपालिका वडा नम्वर ५ को पिपलटारमा हुने महोत्सवमा जालपा मिडिया सर्भिस र एभरेष्ट ईभेन्ट म्यानेजमेन्टको व्यवस्थापन रहेको क्लबका अध्यक्ष उद्धव पनेरुले जानकारी दिए ।

महोत्सवमा विधागत खेलकुद, लोकनृत्य, स्थानीय उत्पादनहरुको प्रदर्शनी, लोपोन्मुख रीतिरिवाज र संस्कृति झल्कने झाँकीहरुको प्रदर्शनी रहने अध्यक्ष पनेरुले जानकारी दिए ।

यसैगरी महोत्सवमा चर्चित कलाकारहरुको सांगितिक प्रस्तुति रहेको छ ।

११ दिनसम्म चल्ने महोत्सव करिब ७० हजारले अवलोकन गर्ने जनाएको छ ।

महोत्सव अवधिभर दुई करोडभन्दा बढीको कारोबार हुने अपेक्षा गरिएको छ ।