नुवाकोट – क्लबस्तरीय नकआउट प्रथम ध्रुव अमात्य स्मृति कप फुटबल प्रतियोगिताको उपाधि न्यु भिजन युथ क्लब जितेको छ ।
बट्टार युथ क्लबको आयोजनामा भएको प्रतियोगितामा न्यु भिजनले आयोजक क्लबलाई ट्राइब्रेकरमा ५-३ गोलअन्तरले हराएको हो ।
आज भएको फाइनल खेलको निर्धारित समयमा दुवै क्लबबाट गोल हुन नसकेपछि खेल ट्राइब्रेकरमा धकलिएको थियो ।
प्रतियोगितामा आयोजक बट्टार क्लब उपविजेता बनेको छ । विजेताले एक लाख र उपविजेताले ५० हजार नगदसहित प्रमाणपत्र, मेडल र सिल्ड प्राप्त गरेको छ ।
सेमीफाइनलमा न्यु भिजनले थ्रीडी युवा क्लबलाई २-१ गोल र बट्टारले तप्त युवा क्लबलाई ट्राइब्रेकरमा ५-३ गोल अन्तरले हराउँदै फाइनलको यात्रा तय गरेको थियो ।
विजेता र उपविजेतालाई विदुर नगरपालिकाका प्रमुख राजन श्रेष्ठले नगद पुरस्कार, प्रमाणपत्र, मेडल र सिल्ड प्रदान गरे ।
प्रतिक्रिया