विदुर – नुवाकोट उद्योग वाणिज्य संघले आठौँ संस्करणको नुवाकोट महोत्सव अवलोकनकर्तालाई दुध र अण्डाले स्वागत गर्ने भएको छ ।
यहि माघ २६ गतेदेखि फागुन ७ गतेसम्म सदरमुकाम विदुरमा नुवाकोट उद्योग वाणिज्य संघको आयोजना हुन लागिएको महोत्सवमा अवलोकनकर्तालाई दुध र अण्डाले स्वागत गरिने संघका प्रथम उपाध्यक्ष तथा कृषि प्रदर्शनी समितिका संयोजक दिनेशकुमार श्रेष्ठले बताए । महोत्सव अवधिको तीन दिन भेटरिनरी अस्पतालको सहकार्यमा संघले उक्त व्यवस्था गरिएको उनले बताए ।
महोत्सवमा औधोगिक प्रर्दशनी २५० स्टल र स्थानीय उत्पादन तथा कृषि प्रर्दशनी ५० स्टलको व्यवस्था गरिएको उनले जानकारी दिए । नुवाकोट जिल्लाका कृषिउपज उत्पादनको प्रबर्द्धन र बजारको लागि महोत्सव गन्तव्य हुने उनले बताए ।
“महोत्सवले आर्थिक, सामाजिक, साँस्कृतिक रुपमा जिल्लावासीलाई लाभ हुनेछ”, उनले भने “अनुमानित ५ करोडको आर्थिक कारोवार रहने महोत्सवले मन्द रहेका व्यावसायीक गतिविधिलाई चलायमान बनाउने विश्वास लिएका छौं ।”
जिल्ला र बाहिरबाट पाल्नु हुने आगन्तुकका कारण ठप्प रहेका होटल व्यावसाय लगायत सम्पूर्ण व्यावसायको कारोबार बढी आर्थिकस्तर बृद्धि भई सरकारको राजस्व संकलन पनि वृद्धि हुने उनले बताए ।
महोत्सवको लागि आवश्यक स्टल, बाल उद्यान, स्टेजलगातयतका कार्य अन्तिम चरणमा पुगेको उनले जानकारी दिए ।
प्रतिक्रिया