नुवाकोट – आज विश्व रक्तदाता दिवस । रक्तदान गरौ र संसारको धड्कनलाई चलायमान बनाऔ भन्ने मुल नाराका साथ नुवाकोटमा पनि रक्तदान कार्यक्रम गरी मनाइएको छ ।
मानव अधिकार तथा शान्ति समाज जिल्ला शाखा नुवाकोटको आयोजनामा गरिएको खुला रक्तदानमा ८ जना रक्तदाताहरुले रक्तदान गरेका छन् ।
समाजका सभापति नारायण श्रेष्ठले केन्द्रीय कार्यसमितिको परिपत्र अनुसार नुवाकोट शाखाले कोभिड-१९ को महामारीमा बिरामीहरुमा आवश्यक रगतको अभाव नहोस् भन्ने हेतुले विश्व रक्तदाता दिवसमा रक्तदान कार्यक्रम गरिएको बताए ।
यस्तै, नेपाल रेडक्रस सोसाइटी काहुले उपशाखाको आयोजनामा किस्पाङ गाउँपालिकाको वडा नम्बर ३ काहुले भएको रक्तदानमा ३४ जनाले रक्तदान गरेका छन् ।
रक्तदानमा २७ जना पुरुष र ७ जना महिलाले रक्तदान गरेको समृद्ध किस्पाङका अभियन्ता सन्तोष ढुङ्गेलले जानकारी दिए ।
दुवै रक्तदान कार्यक्रममा नेपाल रेडक्रस सोसाईटी जिल्ला शाखा नुवाकोटको रक्तसंचार केन्द्रको प्राविधिक सहयोग र ब्लड अन रिक्वेस्ट ईन नुवाकोटको सहजिकरण रहेको थियो ।
नेपालमा दुइ लाखको हाराहारीमा नियमित रक्तदाता रहेको, महिला रक्तदाता १७ प्रतिशत मात्रै भएकोले शुलभ रगत हुनको लागि यूवा रक्तदाता र महिला रक्तदाताहरु बढाउन आवश्यकता रहेको नेपाल रेडक्रस सोसाइटीले जनाएको छ ।
रक्तदानको महत्वबारे जनचेतना फैलाउन र मानव जीवन बचाउने रक्तदाताहरुको योगदानप्रति कृतज्ञता व्यक्त गर्न हरेक बर्ष जून १४ का दिन यो दिवस मनाउन थालिएको हो । मानव रगत समूह (ब्लड ग्रुप) पत्ता लगाउने वैज्ञानिक कार्ल ल्याण्डस्टिनरको जन्मदिन १४ जुनको अवसरमा सन् २००४ देखि विश्व रक्तदाता दिवस मनाउन थालिएको हो ।
प्रतिक्रिया