नुवाकोट – तारकेश्वर गाउँपालिका वडा नम्बर १ उपल्लोछापका बिपन्न वर्ग तथा अपाङ्गता भएका एक महिलालाई आर्थिक सहयोग र स्वास्थ्य उपचार गरिएको छ ।
स्थानीय बिमला तामाङले उपल्लोछापका दुवै आँखा देख्न नसक्ने बेसाहरा एकल महिला कान्छीमाया तामाङको दयनीय अवस्थालाई आर्थिक सहयोग जुटाउने उद्देश्यले सामाजिक सञ्जालको सदुपयोग गर्दै आफ्नो फेसबुक वालमा कान्छीमायाको नाबालक दुई छोरी र एक छोराको फोटोसहित सेयर गरेकी थिईन् ।
उक्त पोस्ट पछ्याउँदै सामाजिक अभियन्ता रामेश्वर गजुरेलले पुन: आफ्नो फेसबुकको वालमा आर्थिक सहयोगको पोस्ट गरेका थिए । उक्त पोस्ट गरेको केहि समयदेखि तीनदिनसम्ममा विभिन्न क्षेत्रका सहयोगी हातहरुको साथबाट रु.६१ हजार आठसय ५० आर्थिक संकलन भएको उनले जानकारी दिए ।
उनकाअनुसार संकलित रकम मध्ये ४० हजार छसय १० रुपैयाँ नगद र २१ हजार २ सय ४० रुपैयाँ बराबरको करिब छ महिनालाई पुग्ने खाद्यान्न सामाग्री, तीन बच्चाहरूलाई र कान्छीमायालाई जाडोमा लगाउने कपडा, ओढ्ने ओछ्याउने लगायतका सामाग्री प्रदान गरिएको छ ।
यस्तै, नुवाकोट सामुदायिक आँखा केन्द्रको सहकार्यमा कान्छीमाया र उनका छोराछोरीको पनि आँखा चेकजाँच गरिएको छ ।
आँखा चेकजाँच गराउँदा उनको जन्मजात नै आँखाको नानी सानो भएर आँखा नदेख्ने समस्या बढ्दै गएको केन्द्रका प्रमुख शङ्कर अधिकारीले जानकारी दिए । उनकी छोराछोरीको भने एलर्जी इन्फेक्सनको कारणले गर्दा आँखामा थोरै समस्या रहेको जनाएको छ ।
यसअघि कान्छीमायालाई स्थानीय म्हेन्दोमाया क्लबले पनि न्यानो कपडा र ब्ल्यांकेट सहयोग गरेका थिए।
प्रतिक्रिया