बेलकोटगढी । नुवाकोटको पासाङल्हामु मार्ग अन्तर्गत रानीपौवादेखि पिपलटारसम्मको सडक विस्तारका क्रममा आयोजनाले स्थानीयको मागलाई वेवास्था गरिएको सरोकारवालाहरुले बताएका छन् ।

मंगलवार बेलकोटगढी नगरपालिका वडा नं. १० स्थित धमलेमा पासाङल्हामु सरोकार समितिले आयोजना गरेको कार्यक्रममा बोल्दै स्थानीयहरुले सडक निर्माण गर्दा न्यूनतम मापदण्डलाई समेत आयोजनाले वेवास्था गरेको आरोप लगाएका छन् ।

सडक विस्तार गर्दा कटिङ गरिएको माटो जथाभावी फाल्दा बेलकोटगढी नगरपालिका र ककनी गाउँपालिकाभित्रका तलतिरका फाँट पुर्ने तथा सिंचाई कुलो मासिएको पीडितहरुको गुनासो छ । ‘सडक विस्तार गर्दा माटो व्यवस्थापन सही रुपमा नहुँदा खेत र कुलो पुरिएको छ, स्थानीय नवराज जमकट्टेलले भने– ‘दुई वर्षदेखि खेतमा बाली लगाउन र कुलो चलाउन सकिएको छैन ।’ सडक विस्तार गर्दा सडक सीमा दायाँ वाया १५/१५ मिटर मापदण्ड भनिएपनि सडकको माथिल्लो भाग मात्र काटेर सडक आयोजनाले पहिरोको जोखिम निम्त्याएको स्थानीयवासीहरुले गुनासो गरेका छन् । कतिपय घरहरु पहिरोको उच्च जोखिममा रहेपनि आयोजनाले टेवा पर्खाल नलगाएको भन्दै स्थानीयहरुले आक्रोस पोखेका थिए ।

सडक विस्तार गर्दा घर भत्काउनुपर्ने घरधनीलाई आयोजनाले क्षतिपुर्ती वापत रकम दिएपनि सो रकम असमान रहेको पीडितहरुले गुनासो गरेका छन् । बेलकोटगढी नगरपालिका वडा नं. ११ का नवराज तिवारीले पहुँच र सम्पर्कका आधारमा घरको मुआव्जा वितरण गरिएको आरोप लगाए । गल्छी–त्रिशूली–मैलुङ सडकमा पर्ने जग्गा र घरको मुआव्जा दिने प्रक्रिया सुरु भइसकेको अवस्थामा बालाजु–ं रानीपौवा–पिपलटार सडक खण्डका जग्गाधनीहरुले पनि जग्गाको उचित क्षतिपुर्ती पाउनुपर्ने माग अघि पारेका छन् ।

सरोकार समिति अन्र्तगतको उपसमितिका संयोजक राजेन्द्र तिवारीले एकतिरमात्र एकै व्यक्तिको जग्गा अधिग्रहण गर्दा जग्गाकोसमेत मुआव्जा पाउनुपर्ने बताए । उनले सडक निर्माणको काम प्रभावकारी नभएकोले प्रयाप्त साधन प्रयोग गरेर सडक विस्तारको काम खण्ड खण्डमा विभाजन गरेर जति सक्दो चाडो निर्माण गर्न आयोजनासँग माग गरे । प्रभावित क्षेत्रका बासिन्दाकोतर्फबाट माग राख्दै तिवारीले भूक्षय, बाढी, पहिरो र वनजंगलको विनास भएको तर्फ सडक वेखवर रहेकाले यस्ता समस्या समाधानमा लाग्न आयोजनाको ध्यानाकर्षर्ण गराए ।

आयोजनाको तर्फबाट बोल्दै आयोजना प्रमुख निरोज शर्माले २०२१ सालमै सडकको सीमा दायाँवाया १५/१५ मिटर कायम गरी राजपत्रमा सुचना जारी भएकाले जग्गाको मुआव्जा दिन नसकिने बताए । उनले आयोजना अन्र्तगतका टेवा पर्खाल लगाउने काम पहिलो चरणमा सकिएकाले थप जोखिम निम्त्याउने स्थानहरुको पहिचान गरी यस्ता ठाउँमा टेवा पर्खाल लगाउनको लागि रकम माग गरिएको बताए । एक्जिम वैंक भारतको सहयोगमा दुई वर्ष अघि निर्माण सुरु भएको ककनी– पिपलटार सडक खण्डको प्रगती सन्तोषजनक नभएको स्थानीयवासीहरुको आरोप रहेको छ ।