धुन्चे/रसुवाको सदरमुकाम धुन्चेमा एनएमबी बैकले एटीएम सेवा सञ्चालनमा ल्याएको छ । चार वर्षअघि शाखा स्थापना गरेको बैंकले सेवाग्राहीको सहजताका लागि एटीएम सेवा सुरु गरेको हो । सेवा सुरु भएसँगै चेकबाट कारोबार गर्न झन्झट मान्ने सेवाग्राहीलाई रकम निकाल्नका लागि सहज भएको छ ।
भूगोलको हिसाबले रातको समयमा रकम निकाल्न सेवाग्राही नआउने भएकाले बिहान ६ बजेदेखि राति १० बजेसम्म एटीएम काउन्टर खुला रहने शाखाका अप्रेसन इन्चार्ज बिनुपराज खनालले जानकारी दिए । उनले भने– अहिले बिहान ५ बजेदेखि राति १० बजेसम्म सेवा दिइने भए पनि आवश्यकताअनुसार २४सै घन्टा सेवा दिनेछौँ ।
एनएमबी बैंकले जिल्लाको टिमुरेमा समेत शाखा सञ्चालन गरिरहेको छ ।
सदरमुकाममा जनता बैंक र एनबी बैंकले एटीएम सेवा उपलब्ध गराउँदै आएका भए पनि बेलाबेलामा बन्द हुँदा सेवाग्राहीलाई समस्या हुने गरेको थियो । रसुवागढी नाका सञ्चालनमा आएको दुई वर्षदेखि जिल्लामा आर्थिक कारोबार बढेसँगै जिल्लामा एटीएम सेवा सुरु गर्न थालेको हो ।
सदरमुकाम धुन्चेमा एनएमबी, जनता र एनबी बैंकको एटीएम सेवा सञ्चालनमा छन् भने स्याफ्रुमा मेघा र प्रभु बैंक तथा चीनसँगको व्यापारिक नाकामा सेवा दिनका लागि सानिमा बैंकले टिमुरेमा एटीएम सेवा दिइरहेको छ ।
प्रतिक्रिया