विदुर/प्रतिनिधिसभा र प्रदेश सभा निर्वाचनका लागि नुवाकोटमा कायम रहेका मतदान स्थलमध्ये ५४ मतदानस्थल अति संवेदनशील रहेको जिल्ला सुरक्षा समितिले जनाएको छ ।
यसअघिको स्थानीय तहका लागि निर्धारण गरेको १ सय २९ मतदान स्थललाई प्रतिनिधिसभा र प्रदेश सभा निर्वाचनका लागि गरिएको विभाजनको आधारमा सुरक्षाको दृष्टिकोणले ५४ स्थानमा रहेका मतदान स्थल अति संवेदनशील देखिएको प्रमुख जिल्ला अधिकारी जगदीशराज बरालले जानकारी दिए ।
यस्तै, ५० मतदान स्थल संवेदनशील र २५ मतदानस्थल सामान्य निर्धारण गरेर सुरक्षा व्यवस्था मजबुद बनाउने तयारी सुरु गरिएको प्रमुख जिल्ला अधिकारी बरालले बताए । कायम रहेका मतदान केन्द्रको वर्गीकरणका लागि नेपाल कम्युस्टि पार्टी विप्लव समूहको गतिविधि र प्रभावित क्षेत्रलाई बढी संवेदनशील मानिएको छ ।
त्यस्तै, अनपेक्षित राजनीतिक प्रतिस्पर्धा हुने स्थान, भौगोलिक कठिनाइ एवम् विकट बस्ती, जातीय, क्षेत्रीय, सांस्कृतिक र साम्प्रदायिक प्रभाव रहेको स्थान र यसअघिको निर्वाचनको समीक्षालगायतको मापदण्डको आधारमा मतदानस्थलको वर्गीकरण गरिएको हो ।
मतदान स्थलको वर्गीकरणको आधारमा सुरक्षा व्यवस्थाका लागि सुरक्षाकर्मीको तयारी, नेतृत्व, सङ्ख्या निर्धारण गर्ने गरी निर्वाचन सुरक्षा रणनीति बनाउन लागिएको नुवाकोट प्रहरी प्रमुख प्रहरी उपरीक्षक वीरेन्द्रकुमार बस्यालले जानकारी दिए ।
प्रतिक्रिया