अपराधमा संलग्न ९९ जना पक्राउ

विभिन्न अपराधमा संलग्न भइ फरार भएका अपराधी र अभियुक्तहरु ९९ जनालाई नुवाकोट प्रहरीले पक्राउ गरेको छ ।

प्रहरीले गत आर्थिक वर्षमा ९० जना अपराधी र ९ जना अभियुक्त गरि ९९ जनालाई पक्राउ गरेको हो । विहीवार जिल्ला प्रहरी कार्यालयले पत्रकार सम्मेलन गरी दिएको जानकारी अनुसार गत आर्थिक वर्ष २०७२/०७३ मा जिल्ला अदालतबाट फैसला भई फरार रहेका अपराधीहरु ९० जना र मिशिल अदातलमा पेश भई फैसला हुन बाँकी मुद्दाका ९ जना अभियुक्तलाई पक्राउ गरेको हो ।

एक रुपैयाँ ६७ पैसा जरिवाना नतिरेर फरार रहेका देखि १० वर्ष कैद सजाय र २ लाख ५० हजार रुपैया जरिवाना असुल हुन बाँकी रहेका अपराधीसम्म पक्राउ गरिएको जिल्ला प्रहरी कार्यालयमा प्रमुख प्रहरी उपरीक्षक देवबहादुर बोहोराले बताए ।

कतिपयले आफूलाई लागेको अभियोग र सजायको बारेमा समेत जानकारी नभएर कैद र जरिवाना भुक्तान गर्न नआएको पाइएकोले सबैले अदालतमा बाँकी रहेको कैद र जरिवाना बेलैमा असुल गराउनको लागि प्रहरीले फरार अपराधी पक्राउ अभियान चलाइरहेको प्रहरी उपरीक्षक बोहोराले बताए ।

नुवाकोट प्रहरीले गत आर्थिक वर्षमा ५७ वर्ष ६ महिना ९ दिन कैद र ७ लाख १६ हजार ५ सय ९८ रुपैया जरिवाना असुल गर्न सफल भएको छ । प्रहरीले सबैभन्दा कम जालसाजी मुद्दामा फरार मदानपुर–९ का मंगलबहादुर तामाङ, गोपी तामाङ र बुद्धिमाया तामाङलाई १ रुपैयाँ ६७ पैसा जरिवाना असुल गर्न पक्राउ गरेको हो ।

सबै भन्दा बढी लागूऔषध मुद्दामा विदुर नपा–२ का हरिबहादुर बस्नेतलाई २ लाख ५० हजार रुपैया जरिवाना असुलको लागि पक्राउ गरेको हो । प्रहरीले कार्यक्रममा ७८ वर्षिया बृद्ध एकल महिलालाई बलत्कार गर्ने साल्मे–९ का मानसिङ तामाङलाई सार्वजनिक गरेको छ ।

तामाङले सोही गाविसका ७८ वर्षिया बृद्धलाई गत असार २८ बलत्कार गरेको आरोपमा मुद्दा चलाएको छ । बलात्कृत बृद्धको त्रिशूली जिल्ला अस्पतालमा एक साताको उपचार पछि डिस्चार्ज भएको प्रहरीले जनाएको छ ।